Eronda qurbonlar soni 3 919 kishiga yetdi – HRANA

Eronda iqtisodiy muammolar tufayli boshlangan norozilik namoyishlari oqibatida halok bo‘lganlar soni 3 919 kishiga yetdi. 

Inson huquqlari faollari yangiliklari agentligi (Human Rights Activist News Agency, HRANA) xabariga ko‘ra, tartibsizliklar chog‘ida 24 669 kishi qo‘lga olingan. 

AQSHning Virjiniya shtatida joylashgan HRANA bir kun avval Eronda norozilik namoyishlari chog‘ida 3 308 kishi halok bo‘lgani haqida xabar bergan edi. 

Eronda norozilik namoyishlari

Eronda norozilik namoyishlari 2025 yil 28 dekabr kuni Tehrondagi tarixiy “Grand-bazar” bozorida avj oldi. Do‘kon egalari milliy valyutaning xorijiy valyutalarga nisbatan keskin qadrsizlanishi va iqtisodiy qiyinchiliklar ortib borayotgani sababli norozilik namoyishlarini boshladi. Namoyishlar tezda mamlakatning ko‘plab shaharlariga tarqaldi. 

8 yanvar kuni Tehronda norozilik namoyishlari keskinlashdi. Tartibsizliklar davomida namoyishchilar (jumladan, turli guruhlar) ko‘plab ob’ektlar – ko‘plab avtobuslar va tez yordam mashinalari, o‘nlab turar-joy binolari, banklar, masjidlar, shifoxonalar, shuningdek, boshqa davlat va jamoat binolariga o‘t qo‘yib, vayron qilgan. Norozilik namoyishlari kuchayganidan so‘ng Eron hukumati internetga kirish bo‘yicha umummilliy cheklov joriy qildi. 

Erondagi namoyishlar to‘lqini pasaygan bo‘lsa-da, HRANA ma’lumotlarni yangilashda davom etmoqda, yangi tasdiqlangan holatlarni qayd etmoqda va halok bo‘lganlar va hibsga olinganlar soni haqidagi ma’lumotlarni izchil oshirib bormoqda. 

Eron rasmiylari hozirgacha tartibsizliklar chog‘ida halok bo‘lganlar va yaradorlar soni bo‘yicha rasmiy statistikani e’lon qilmagan. Shu bilan birga, avvalroq Tehronda rasmiy tuzilmalar terrorchilik tashkilotlari a’zolari yoki norozilik namoyishlarini tashkil etish va kuchaytirishga aloqador bo‘lgan ig‘vogarlar deb atagan uch mingga yaqin kishi hibsga olingani haqida xabar berilgan edi. 

Eron oliy rahbari oyatulloh Ali Xomanaiy 17 yanvar kuni norozilik namoyishlari chog‘ida Isroil va AQSH bilan bog‘liq shaxslar mamlakatga katta zarar yetkazgani va bir necha ming kishining o‘limiga sabab bo‘lganini aytdi.