Eron Rossiyadan qiruvchi samolyot olyapti

Bugun, 11 mart kuni Eron Rossiyadan ilg‘or Su-35 qiruvchi samolyotlarini sotib olish bo‘yicha kelishuvga erishdi. Bu haqda davlat matbuotiga tayanib, “Reuters” xabar berdi.

“Suxoy-35” qiruvchi samolyotlari Eron uchun texnik jihatdan maqbuldir. Eron ularni sotib olish bo‘yicha shartnomani yakunladi”, deya Eronning BMTdagi missiyasi bayonot berdi.  

Missiya kelishuvning tafsilotlarini oshkor etmagan. Biroq Eron yana bir qancha boshqa, nomlari oshkor qilinmagan davlatlardan harbiy samolyotlar sotib olish masalasini ko‘rib chiqayotgani ma’lum qilingan.

Aytish joizki, G‘arb Eronni Rossiyaga dronlar yuborganlikda ayblab keladi. Rasmiy Tehron ham buni tan olgan, biroq dronlar o‘tgan yili Moskvaning Ukrainaga bostirib kirishidan oldin yuborilganini aytgan. Moskva ham o‘z kuchlari Ukrainada Eron tomonidan ishlab chiqarilgan uchuvchisiz uchoqlardan foydalanayotganini rad etgan bo‘lsada, jang maydonida urib tushirilgan dronlar ularning Eronda ishlab chiqilganini isbotlagan.

Rossiya Prezidenti Vladimir Putin ham o‘tgan yilning iyul oyida Tehronda Eron oliy rahnamosi Oyatulloh Ali Xomanaiy bilan uchrashib, Ukrainadagi urush yuzasidan G‘arb bosimi ostida o‘zaro aloqalarni yanada yaqinlashtirish zarurligini ta’kidlagan.

Eslatib o‘tamiz, oldinroq Eronda 1650 km masofaga ucha oladigan qanotli raketa ishlab chiqilgani aytilgandi. Bundan tashqari, Eron o‘zining “Burgut 44” deb nomlangan birinchi yerosti havo kuchlari bazasini ochganini e’lon qilgan edi.