Eron birinchi havo taksisini ishga tushirdi

Eron kecha, 24 may kuni mamlakatdagi birinchi havo taksisini rasman ishga tushirdi va bu milliy aviatsiya rivojlanishida yangi sahifa ochdi. Bu haqda IRNA xabar berdi.

Prezident Mas’ud Pezeshkiyonning videomurojaati ishtirokida Xurramshahr ozod qilinganining bir yilligi hamda Yo‘l va shaharsozlik vazirligi loyihalari ochilishiga bag‘ishlangan tantanali marosim bo‘lib o‘tdi.

Birinchi havodagi taksi reysi Karaj va Qazvin shaharlarini bog‘lab, muntazam transportning boshlanishini belgiladi.

Vazir maslahatchisi, Aloqa va axborot texnologiyalari vazirligiga qarashli “Payam” maxsus iqtisodiy zonasi va xalqaro aeroporti bosh direktori Mohsen Hasanlu mazkur tadbir mamlakat aviatsiya sanoati uchun muhimligini ta’kidladi.

“Aviataksining ishga tushirilishi katta istiqbolga ega bo‘lgan muhim yutuqdir”, dedi u.

Hasanluning so‘zlariga ko‘ra, yangi transport turi “Payam” maxsus iqtisodiy zonasiga yangi sarmoyalarni jalb qilish, milliy iqtisodiyotni rag‘batlantirish va Alborz viloyatini rivojlantirishga yordam beradi. Bundan tashqari, aholining aviatsiya xizmatlaridan keng foydalanishi uchun qulay sharoit yaratadi.

“Havo taksilarining joriy etilishi to‘liq foydalanilmayotgan havo yo‘llarini qayta tiklashda muhim rol o‘ynaydi”, dedi Hasanlu.

Uning ta’kidlashicha, bu xalqqa havo qatnovidan foydalanish imkonini beradigan va investorlarga yangi investitsiya imkoniyatlarini taqdim etadigan innovatsion xizmat.

Eronning birinchi havo taksisining ishga tushirilishi mamlakat transport infratuzilmasini yangilash va aviatsiya xizmatlaridan foydalanish imkoniyatlarini kengaytirishdagi muhim qadam sifatida baholanmoqda.