Erik Ten Xag “Yunayted”ga qaysi futbolchini olib kelmoqchiligi ochiqlandi

"Manchester Yunayted" boshqaruviga kelishi mumkin bo‘lgan Erik Ten Xag "Monako" yarim himoyachisi Aureliyen Tchuamenini “qizil iblislar” safida ko‘rmoqchi. Bu haqda ESPN o‘zining manbalariga tayanib, xabar berdi.

Shuningdek, manbaning xabariga ko‘ra, Ten Xag aprel oyining oxirida  “Manchester Yunayted” murabbiyi sifatida rasman tasdiqlanishi mumkin.

"Yunayted" rahbariyati yozgi transfer oynasi uchun har bir pozitsiyadagi o‘yinchilarning qisqa ro‘yxatini shakllantirib chiqqan va ushbu ro‘yxat yuzasidan Ten Xagga o‘z rejalarini taqdim etishga ruxsat beriladi.

Erik Ten Xag Manchesterga olib kelmoqchi bo‘lgan futbolchilar orasida 22 yoshli Aureliyen Tchuameni birinchilardan bo‘lib turibdi. U Fransiya chempionati Liga 1 da mavsumni yaxshi o‘tkazmoqda. 

"Monako" yozda yulduz futbolchisi uchun transfer  muzokaralariga ochiq va sotuv narxi sifatida 60-70 million yevro so‘raydi. Pari Sen-Jermen (PSJ) ham fransuz futbolchisiga qiziqish bildirmoqda. Ammo futbolchining o‘zi Fransiyadan ketishni ma’qul ko‘rayotgani ma’lum. 

Shuningdek, Londonning "Chelsi" jamoasi  Tchuamenini xarid qilish variantiga qiziqib qolgan. Ular hatto Aureliyenning agenti va "Monako" bilan ham transfer borasida aloqa o‘rnatdi. Ammo “Yunayted” “Chelsi”dagi muammolar sababli Aurelianning transferida ustunlik qilishi mumkin.

Ma’lumot o‘rnida, Aureliyen Tchuameni joriy mavsumda “Monako” safida 44 ta uchrashuvda maydonga tushib, 3 ta gol urdi va 2 ta golli uzatma amalga oshirdi.  “Transfermarkt” portali 22 yoshli futbolchiga 40 million  yevro narx belgilagan.

Ma’ruf Abdumalikov