Endi ayrim xizmatlar uchun elektron hujjatdan foydalanish mumkin bo‘ladi

Endi O‘zbekistonda fuqarolar bir qator xizmatlardan foydalanishda hujjatlarning qog‘oz nusxasini taqdim etishi shart emas. Bu haqda joriy yilning 20 oktyabr kuni Adliya vazirligi davlat ro‘yxatidan o‘tkazgan 3958- va 3959-raqamli idoraviy hujjatlarda belgilangan.

Mazkur o‘zgartishlar bilan 33 ta idoraviy hujjatga tuzatishlar va qo‘shimchalar kiritildi. Unga ko‘ra, fuqarolar biometrik pasport, ID-karta, tug‘ilganlik va nikoh guvohnomalari, pensiya guvohnomasi, nogironlik to‘g‘risidagi ma’lumotnoma kabi hujjatlarning qog‘oz shakli o‘rniga my.gov.uz va “Ijtimoiy karta” mobil ilovasidagi elektron shaklidan foydalanishi mumkin.

Raqamli hujjatlar quyidagi holatlarda qabul qilinadi?

• Banklarda – bank xizmatlaridan foydalanish va ayrim moliyaviy operatsiyalarni amalga oshirishda shaxsni tasdiqlashda;
• notarial idoralarda – notarial harakatlarni amalga oshirishda;
• aeroportlarda – O‘zbekiston ichidagi aviareyslarga ro‘yxatdan o‘tishda;
• urush qatnashchilariga kompensatsiya berishda;
• telekommunikatsiya xizmatlarida – abonent bilan xizmat ko‘rsatish shartnomasini tuzishda;
• qon va uning tarkibiy qismlarini topshirishda – donorning shaxsini tasdiqlashda;
• lombardlar bilan shartnoma tuzishda;
• tibbiy-ijtimoiy muassasalarda pullik xizmatlar ko‘rsatishda;
• fuqarolarni harbiy ro‘yxatga olishda va boshqa bir qator xizmatlardan foydalanishda.

Ma’lumot uchun, hukumatning 2024 yil 27 dekabrdagi 897-son qaroriga muvofiq, shaxsni tasdiqlovchi va boshqa bir qator hujjatlarning unifikatsiyalangan raqamli servislari joriy etilgan.