Dunyoning eng baxtli davlatlari ma’lum bo‘ldi. O‘zbekiston nechanchi o‘rinda?

Bugun, 20 mart kuni “World Happiness Report 2024” nashri tomonidan e’lon qilingan reytingda O‘zbekiston Markaziy Osiyodagi eng baxtli mamlakat deb topildi.  

Xalqaro Baxt kuni munosabati bilan mutaxassislar tomonidan tuzilgan ro‘yxatdan 143 mamlakat o‘rin olgan bo‘lib, birinchi o‘rinni Finlyandiya egalladi. Ushbu mamlakat mazkur reytingda yetti yildan beri peshqadamlikni boy bermayapti. Ikkinchi o‘rinda Daniya bo‘lib, kuchli uchlikni Islandiya yakunlab bergan.

Yuqori o‘ntalikdan Shvetsiya, Isroil, Niderlandiya, Norvegiya, Lyuksemburg Shveysariya va  Avstraliya davlatlari o‘rin olgan.

Markaziy Osiyo davlatlaridan:
O‘zbekiston – 47-o‘rinda;
Qozog‘iston – 49-o‘rinda;
Qirg‘iziston – 75-o‘rinda;
Tojikiston – 88-o‘rinda.

Baxtli mamlakatlar qatorida Rossiya 72-o‘rinda, Ukraina 105-o‘rinda qayd etilgan. Shuningdek, MDH davlatlaridan Moldova 71-o‘rinda, Armaniston 82-o‘rinda, Ozarbayjon 101-o‘rinda ko‘rsatilgan. Belarus hamda Turkmaniston ro‘yxatga kiritilmagan.

Afg‘oniston esa 143-o‘rin bilan so‘nggi pog‘onadan joy olgan. 

Ma’lumot uchun, ushbu reytingni shakllantirishda aholi jon boshiga Yalpi ichki mahsulot ko‘rsatkichlari, mamlakatda o‘rtacha umr ko‘rish davomiyligi, fuqarolarni ijtimoiy qo‘llab-quvvatlash va ularning fuqarolik erkinliklariga rioya etilishi to‘g‘risidagi ma’lumotlar, shuningdek, mamlakatdagi korrupsiya darajasi  hisobga olinadi.

Rayhona Ulkanbayeva