“Donald Tramp” Qurbon hayitida so‘yiladi (video)

Bangladeshda albinos buqasi – tashqi ko‘rinishi sabab Donald Trampga o‘xshatilgani uchun internetda “Donald Tramp” laqabi qo‘yildi. Albinos buqasi Qurbon hayiti kuni so‘yilishi rejalashtirilmoqda.

Taxminan 700 kilogramm og‘irlikdagi buqa ijtimoiy tarmoqlarda katta sensatsiyaga aylangan, uni dunyo bo‘ylab foydalanuvchilar kuzatgan va muhokama qilgan. Biroq OAV tayanib berilgan ma’lumotlarga ko‘ra, u yaqin kunlarda Qurbon hayiti munosabati bilan qurbonlik qilinadi.

Hayvonga “Donald Tramp” nomining berilishi esa faqat mahalliy aholi hazili sifatida paydo bo‘lgan bo‘lib, internetda keng tarqalib ketgan. Bunda hech qanday siyosiy maqsad nazarda tutilmagan. Shu sababli bu voqea ommaviy axborot vositalarida katta qiziqish uyg‘otgan.

Ijtimoiy tarmoqlarda foydalanuvchilarning munosabati turlicha bo‘lgan. Ayrimlar hayvonning taqdiriga achinish bildirgan, boshqalar esa Qurbon hayiti diniy an’ana ekanini va bu millionlab musulmonlar tomonidan hurmat qilinadigan amaliyot ekanini ta’kidlagan. Yana ba’zi foydalanuvchilar esa, bu buqaga berilgan laqabni kinoya bilan muhokama qilgan va agar Donald Trampning o‘zi bu xabarni ko‘rsa, u bunga qanday munosabat bildirishi mumkinligi haqida hazilomuz fikrlar bildirgan.