Dembele o‘z pozitsiyasida eng kuchli bo‘lishi mumkin – Xavi 

Xavi “Barselona” Usmon Dembele bilan tezroq yangi shartnoma imzolashini xohlaydi. Bu haqda uning so‘zlariga tayanib, “Goal” nashri xabar berdi.

“Barselona” bosh murabbiyining fikricha, Usmon o‘z pozitsiyasida dunyoning eng yaxshi futbolchisiga aylanishi mumkin.

“Umid qilamanki, u biz bilan qoladi. Men buni allaqachon aytganman va yana takrorlashda muammo yo‘q. Usmon o‘z pozitsiyasida dunyoning eng yaxshi futbolchisiga aylanishi mumkin. Klub bugun va kelajak uchun harakat qilmoqda. Usmon muhim futbolchi va umid qilamanki, u qolishga qaror qiladi. Men darhol u bilan yangi shartnoma imzolagan bo‘lardim”, degan Xavi.

Xavining qo‘shimcha qilishicha, Usmon Dembele mashg‘ulotlarga ajoyib munosabatda va g‘alabalarga chanqoq.

“Men “Barselona”ni boshqarish mas’uliyatni o‘z zimmamga olganimdan beri, Usmoning mashg‘ulotlarga munosabati ajoyib, sodiqligi va ishtiyoqi bilan boshqalarga namuna bo‘la oladi. U oldin qanday bo‘lganini bilmayman, lekin men uni g‘ayratli, baxtli va g‘alabaga chanqoq xarakterga ega ekanligini ko‘raman. Men uchun uning dam olish kunida mashg‘ulotlarga kelgani ajablanarli emas. U ajoyib professional”, degan “Barselona” ustozi.

Ma’lumot o‘rnida, joriy mavsumda Usmon Dembele “Barselona” safida 22 ta uchrashuvda maydonga tushib, 2 ta gol urdi va 10 ta golli uzatma amalga oshirdi. Uning “ko‘k anorranglilar” bilan amaldagi shartnomasi shu yilning yozida yakuniga yetadi. “Transfermarkt” portali fransiyalik vingerni 30 million yevroga baholamoqda.

Ma’ruf Abdumalikov