Дембеле ўз позициясида энг кучли бўлиши мумкин – Хави 

Хави “Барселона” Усмон Дембеле билан тезроқ янги шартнома имзолашини хоҳлайди. Бу ҳақда унинг сўзларига таяниб, “Gоаl” нашри хабар берди.

“Барселона” бош мураббийининг фикрича, Усмон ўз позициясида дунёнинг энг яхши футболчисига айланиши мумкин.

“Умид қиламанки, у биз билан қолади. Мен буни аллақачон айтганман ва яна такрорлашда муаммо йўқ. Усмон ўз позициясида дунёнинг энг яхши футболчисига айланиши мумкин. Клуб бугун ва келажак учун ҳаракат қилмоқда. Усмон муҳим футболчи ва умид қиламанки, у қолишга қарор қилади. Мен дарҳол у билан янги шартнома имзолаган бўлардим”, деган Хави.

Хавининг қўшимча қилишича, Усмон Дембеле машғулотларга ажойиб муносабатда ва ғалабаларга чанқоқ.

“Мен “Барселона”ни бошқариш масъулиятни ўз зиммамга олганимдан бери, Усмонинг машғулотларга муносабати ажойиб, содиқлиги ва иштиёқи билан бошқаларга намуна бўла олади. У олдин қандай бўлганини билмайман, лекин мен уни ғайратли, бахтли ва ғалабага чанқоқ характерга эга эканлигини кўраман. Мен учун унинг дам олиш кунида машғулотларга келгани ажабланарли эмас. У ажойиб профессионал”, деган “Барселона” устози.

Маълумот ўрнида, жорий мавсумда Усмон Дембеле “Барселона” сафида 22 та учрашувда майдонга тушиб, 2 та гол урди ва 10 та голли узатма амалга оширди. Унинг “кўк анорранглилар” билан амалдаги шартномаси шу йилнинг ёзида якунига етади. “Тransfermarkt” портали франциялик вингерни 30 миллион еврога баҳоламоқда.

Маъруф Абдумаликов