Davlat to‘ntarishi rahnamolari Rossiyadan bo‘lganmi? Elchixona tilga kirdi

Rossiyaning Germaniyadagi diplomatik muassasalari noqonuniy tuzilmalar vakillari bilan hech qanday aloqada emas. Bu haqda Rossiyaning Berlindagi elchixonasi bugun, 7 dekabr kuni Germaniya Bosh prokuraturasining iddaosiga javoban tarqatgan bayonotda aytiladi. 

“Rossiyaning Germaniyadagi elchixonasi Rossiyaning Germaniyadagi diplomatik va konsullik idoralari terrorchilik guruhlari va boshqa noqonuniy tuzilmalar vakillari bilan aloqa o‘rnatmayotganiga e’tibor qaratadi”, deya ta’kidladi Rossiya diplomatik missiyasi. 

Germaniya Bosh prokuraturasi mamlakatda davlat to‘ntarishini amalga oshirishga urinish aniqlangani va gumondorlar qo‘lga olingani, to‘ntarishni amalga oshirishda asosiy aloqa shaxsi hozirda Rossiya Federatsiyasi hisoblanishi, ayblanuvchi Genrix XIII P.R. Rossiya Federatsiyasining Germaniyadagi vakillari bilan allaqachon aloqaga chiqqani, biroq javob ololmagani haqida bayonot berdi.  

Bosh prokuratura Rossiyaning Berlindagi elchixonasiga va OAVga davlat to‘ntarishiga tayyorgarlik ko‘rishda gumon qilinayotgan shaxslarning Rossiya vakillari bilan aloqalari tafsilotlari haqida ma’lumot bermagan. 

“Iltimos, tushuningki, biz matbuot bayonotida e’lon qilganimizdan tashqari yangi ma’lumot bera olmaymiz”, deydi nemis prokuraturasi vakili 7 dekabr kuni TASS agentligi muxbiriga.

To‘tarishga urinish

Avvalroq Germaniya Bosh prokuraturasi mamlakatda davlat to‘ntarishiga urinish bostirilgani haqida xabar bergan edi. 3000 ga yaqin politsiyachi ishtirok etgan keng ko‘lamli operatsiya davomida Germaniya maxsus xizmatlari davlat to‘ntarishini uyushtirganlikda gumon qilingan 50 dan ortiq kishidan 25 nafarini qo‘lga oldi. 

Hibsga olinganlar orasida Rossiya Federatsiyasi fuqarosi – Vitaliya B. Ham bor. U gumonlanuvchilarga Rossiya Federatsiyasi vakillari bilan bog‘lanishda yordam bergani aytilmoqda. Bosh prokuratura ma’lumotlariga ko‘ra, hibsga olinganlar fitnaning mafkuraviy asoslarini millatchi nemis Reichsbuerger harakati va Qo‘shma Shtatlarda keng tarqalgan QAnon fitna nazariyasidan olgan.

Hozirgi operatsiya tarixdagi eng yirik operatsiyalardan biriga aylandi. Tintuvlar Germaniyaning 16 federal shtatlaridan 11 tasida, 130 dan ortiq uy va xonadonlarda o‘tkazildi. 

Shu bilan birga, terrorchilik tashkiloti yirik va ildiz otgan bo‘lib chiqdi: uning tarkibiga Prussiya knyazlari merosxo‘ri, siyosatchi, yuqori martabali harbiylar va Mudofaa vazirligining maxsus kuchlari askarlari kirgan. 

To‘ntarishni reja qilganlar hukumatga o‘xshash kengashni, shuningdek, harbiy qanotni yaratgan, boshqa narsalar qatori kuch tuzilmalarida – armiya va politsiyada tarafdorlarni faol ravishda jalb qilgan. Tashkilot a’zolari go‘yoki kichik qurolli guruh bilan Bundestag (parlament)ga bostirib kirishni rejalashtirgan.