Dam olish kunlari beqaror ob-havo kuzatiladi

Joriy yilning 8-9 aprel kunlari O‘zbekistonning qator hududlarida qisqa muddatli yomg‘ir yog‘ib, momaqaldiroq kuzatiladi. Baland tog‘larda yomg‘ir qorga aylanishi mumkin. Harorat kechalari 7-12 daraja, kunduzi 22-27 daraja iliq bo‘ladi. Bu haqda Respublika Gidrometeorologiya xizmati markazi xabar berdi.

Ertaga, 8 aprel kuni kechasi va ertalab Qoraqalpog‘iston Respublikasi va Xorazm viloyatida, kunning ikkinchi yarmida Toshkent, Samarqand, Jizzax, Sirdaryo viloyatlaridagi ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin. Qolgan hududlarda yog‘ingarchilik kutilmaydi.

Yakshanba, 9 aprel kuni faqat Qoraqalpog‘iston Respublikasi, Xorazm, Buxoro, Navoiy viloyatlarida yomg‘ir yog‘adi.

Mazkur kunlarda harorat kechalari 7-12 daraja, kunduz kunlari 22-27 daraja iliqni tashkil etadi. 

7-9 aprelda respublikaning tog‘oldi va tog‘li hududlarida vaqti-vaqti bilan yomg‘ir yog‘adi.

Poytaxt Toshkentda ertaga, 8 aprelda kunning ikkinchi yarmida qisqa muddatli yomg‘ir yog‘ishi, momaqaldiroq bo‘lishi mumkin. 9 aprel kuni yog‘ingarchilik kutilmaydi. Harorat kechasi 8-10 daraja, kunduzi 22-25 daraja iliq bo‘ladi.