Byudjetni taqsimlovchilarning xarajatlari ustidan parlament nazorati deyarli sezilmayapti – Mirziyoyev

O‘zbekistonda byudjet mablag‘larini taqsimlovchilarning xarajatlari ustidan parlament nazorati deyarli sezilmayapti. Bu haqda bugun, 18 noyabr kuni Prezident Shavkat Mirziyoyev Oliy Majlis Qonunchilik palatasining saylovdan keyingi birinchi majlisida so‘z ochdi.

Yangilangan Konstitutsiyaga ko‘ra, Davlat byudjeti ijrosi ustidan nazoratni amalga oshirish Qonunchilik palatasining mutlaq vakolatiga kiradi. Bu muhim vakolat deputatlar zimmasiga katta mas’uliyat ham yuklaydi. 

Prezident birinchi galda palataning Davlat byudjeti ijrosini nazorat qilish mexanizmlarini yanada kuchaytirishning vaqti-soati kelgani ta’kidladi. Jumladan, Hukumatning davlat byudjetiga doir barcha hisobotlarini palataga faqat Byudjet kodeksida belgilangan audit xulosasi bilan birgalikda kiritish amaliyotiga o‘tish kerak.

Bundan tashqari, davlat byudjeti ijrosini nazorat qilishda parlament qo‘mitalari rolini oshirish ham muhim ahamiyatga ega. Hozirgi vaqtda birinchi darajali byudjet mablag‘larini taqsimlovchilarning xarajatlari ustidan parlament nazorati deyarli sezilmayotgani, yangi saylangan deputatlar ushbu masalaga alohida yondashishi zarurligi qayd etildi.

Eslatib o‘tamiz, oldinroq  Mirziyoyev Oliy Majlisda muxolifatni jonlantirish zarurligini aytgandi.