Buxorodagi savdo majmuasida yong‘in chiqdi

Buxoro viloyati G‘ijdivon tumanidagi savdo majmuasida yong‘in sodir bo‘ldi. Bu haqda Favqulodda vaziyatlar vazirligi xabar berdi.

Qayd etilishicha, bugun, 7 yanvar kuni soat 05:20 da G‘ijdivon tumani Degrezon ko‘chasida joylashgan savdo majmuasida yong‘in sodir bo‘layotganligi to‘g‘risida tuman Favqulodda vaziyatlar bo‘limiga xabar kelib tushgan.

Chaqiruvga ko‘ra, 8 ta yong‘in-qutqaruv ekipaji soat 05:23 da voqea joyiga yetib borib, yong‘in soat 05:45 da qurshab olingan va 07:50 da to‘liq bartaraf etilgan.

Dastlabki ma’lumotlarga ko‘ra, savdo majmuasining taxminan 250 kvadrat metr maydonida ichki qismi va mahsulotlari yongan. Yong‘in oqibatida hech kim tan jarohati olmagan va halok bo‘lmagan.

Mazkur holat yuzasidan voqea joyiga viloyat FVB rahbariyati hamda tuman FVB rahbar xodimlari yetib borgan.

Avvalroq, Buxorodagi o‘quv markazi binosida portlash sodir bo‘lgani hamda Toshkentda korxona sexi yonib ketgani haqida xabar berilgan edi.

Ozoda Choriyeva