Buxoro viloyatida ikkita shamol elektr stansiyasi quriladi

Jamiyat

image

O‘zbekiston Respublikasi Prezidenti tomonidan Buxoro viloyatining G‘ijduvon tumanida quvvati 500 mvt bo‘lgan hamda Peshku tumanida quvvati 300-500 bo‘lgan shamol elektr stansiyalarini qurish to‘g‘risidagi qarorlar imzolandi.

Hujjatlar bilan O‘zbekiston Respublikasi Hukumati nomidan Investitsiyalar va tashqi savdo vazirligi, “International Company for water and power projects” (Saudiya Arabistoni) kompaniyasi (keyingi o‘rinlarda – Investor) va quyidagi loyiha kompaniyalari o‘rtasida 2021 yil 24 yanvarda imzolangan investitsiya bitimlari tasdiqlandi:

•    Investor tomonidan “Buxoro viloyatining Peshku tumanida quvvati 300-500 MVt bo‘lgan shamol elektr stansiyasini qurish” investitsiya loyihasi doirasida ta’sis etilgan “ACWA Power Dzhankeldy Wind” MCHJ;
•    Investor tomonidan “Buxoro viloyatining G‘ijduvon tumanida quvvati 500 MVt bo‘lgan shamol elektr stansiyasini qurish” investitsiya loyihasi doirasida ta’sis etilgan “ACWA Power Bash Wind” MCHJ.

Investorlar va loyiha kompaniyalari quyidagilar bo‘yicha majburiyatlarni o‘z zimmalariga oldilar:

•    investitsiya loyihalarini amalga oshirishning butun davri mobaynida shamol elektr stansiyasini loyihalashtirish, moliyalashtirish, qurish hamda ekspluatatsiya qilish;
•    har bir investitsiya loyihasi bo‘yicha yuzaga kelishi mumkin bo‘lgan xavf-xatarlarni o‘z zimmalariga olgan holda, jami dastlabki baholash bo‘yicha 650 mln AQSH dollari miqdorida to‘g‘ridan-to‘g‘ri xorijiy investitsiyalarni jalb etish.

Shuningdek “O‘zbekiston milliy elektr tarmoqlari” AJ va loyiha kompaniyalari o‘rtasida to‘g‘ridan-to‘g‘ri muzokaralar natijasida imzolangan Elektr energiyasini sotib olish to‘g‘risidagi bitimlar ma’qullandi. Ushbu bitimlarga muvofiq:

Loyiha kompaniyalari:

a) ishlab chiqarilgan elektr energiyasini yagona xaridor bo‘lgan “O‘zbekiston milliy elektr tarmoqlari” AJga kafolatlangan tarzda sotish majburiyatini oladi;

b) qurilish davridagi o‘z majburiyatlari lozim darajada bajarilishining ta’minoti sifatida 18 mln AQSH dollari miqdorida bank kafolatini taqdim etadi;

•    Investor va loyiha kompaniyalari shamol elektr stansiyalarini yagona elektr energiyasi tarmog‘iga ulash uchun havo elektr uzatish tarmoqlari va boshqa elektr inshootlari qurilishini amalga oshiradi, ushbu ishlar uchun sarflangan xarajatlar “O‘zbekiston milliy elektr tarmoqlari” AJ tomonidan 10 yil davomida oylik to‘lovlar asosida qoplanadi;
•    “O‘zbekiston milliy elektr tarmoqlari” AJ 25 yil davomida elektr energiyasini kafolatlangan tarzda xarid qilish majburiyatini oladi va elektr energiyasi uchun to‘lovni milliy valyutada amalga oshiradi.

Investitsiya bitimlari va Elektr energiyasini sotib olish to‘g‘risidagi bitimlarning amal qilish muddati davomida elektr energiyasining sotib olinishi chet el valyutasida denominatsiyalangan qat’iy tarif bo‘yicha amalga oshirilishi belgilandi.


Maqola muallifi

Teglar

elektr energiyasi

Baholaganlar

36

Reyting

2.9

Maqolaga baho bering

Doʻstlaringiz bilan ulashing