Bu yil O‘zbekiston tarixidagi eng issiq kuz bo‘ldi – O‘zgidromet

2023 yilda O‘zbekistonda meteorologik kuzatuvlarning barcha yillari uchun eng issiq kuz kuzatildi. Bu haqda O‘zgidromet xabar berdi.

Sinoptiklarning aytishicha, noyabr oyida meteorologik kuzatuvlarning barcha yillari uchun eng issiq harorat qayd etilgan. Havoning o‘rtacha statistik harorati keskin o‘zgarib turishi noyabr oyi uchun xosdir. 

"Ammo boshqa yillardan farqi – bu o‘zgarishlar yuqori harorat fonida sodir bo‘ldi. Oyning katta qismida havo harorati o‘rtacha ko‘p yillik qiymatlarga nisbatan yuqori bo‘ldi va faqat sovuq davrda iqlimiy me’yorgacha pasaydi. Barcha hududlarda harorat me’yoridan 3−6 darajaga ko‘p bo‘ldi", deyiladi hisobotda.

Ma’lumotlarga ko‘ra, eng issiq kunlarda maksimal havo harorati 23-28 darajagacha yetgan. Minimal harorat faqat respublikaning shimolida salbiy qiymatlargacha pasaygan.

"Bu oyning boshidan oxirigacha harorat tez pasayadi, chunki noyabr oyining oxiri qish mavsumiga tutashadi. Respublika hududining katta qismida oyning birinchi yarmida kunduzgi harorat odatda 15-20 daraja, ikkinchi yarmida esa 10-15 daraja atrofida bo‘ldi", deyiladi xabarda.

2023 yilning noyabrida bunday tendensiyalar kuzatilmadi, oyning boshida ham, oxirida ham haroratning yuqori qiymatlari kuzatildi. Respublika bo‘yicha nisbatan quruq havo bo‘ldi, yog‘ingarchilik kam va me’yor atrofida bo‘ldi.

Ushbu oyda 2023 yilning kuz mavsumidagi eng yuqori, me’yoridan 3−6 daraja issiq bo‘ldi. Oktyabr oyi esa o‘rtacha harorat me’yoridan 1,5−2,5 daraja yuqori, sentyabr esa o‘rtacha ko‘p yillik qiymatlarga yaqin bo‘lgan.