Borrel G‘arbning global hukmronlik davri tugaganini tan oldi

G‘arbning global hukmronlik davri nihoyat Rossiyaning Ukrainadagi urushi va G‘azo sektoridagi mojaroning boshlanishi bilan yakunlandi. Bu fikrni Yevropa Ittifoqi diplomatik xizmati rahbari Jozep Borrel o‘z blogida bildirdi.

"Agar hozirgi geosiyosiy keskinliklar G‘arbni dunyoning qolgan qismiga qarama-qarshi qo‘yishda davom etsa, Yevropa o‘z xavfsizligiga tahdidlar nuqtai nazaridan qorong‘u kelajakka duch keladi. G‘arb hukmronligi davri nihoyat tugadi. Garchi biz buni nazariy jihatdan tushunsak ham, bu yangi voqelikdan har doim ham amaliy xulosalar chiqarmaymiz", deb yozgan u. 

Borrelning so‘zlariga ko‘ra, Ukraina va G‘azodagi urush global G‘arb va global Janub o‘rtasidagi qarama-qarshilik xavfini "sezilarli darajada oshirgan". Buni allaqachon Sahel va Afrikaning boshqa qismlarida ko‘rish mumkin.

Uning ta’kidlashicha, jahon janubidagi ko‘plab davlatlar G‘arbni "ikki tomonlama standartlarda" ayblamoqda. Yevropa diplomatiyasi rahbari bu faktni adolatsiz deb hisoblaydi va o‘z navbatida buning uchun javobgarlikni Rossiya va uning propagandasiga yuklaydi.

"Rossiya vaziyatdan foydalana oldi. Biz bu qarashga qarshi kurashishimiz va buni nafaqat so‘z bilan qilishimiz kerak. Kelgusi oylarda hamkorlarimizning ishonchini qaytarish uchun katta sa’y-harakatlar qilishimiz kerak”, deydi Borrel.

Myunxen xavfsizlik konferensiyasi natijalariga bag‘ishlangan blogida Borrel Yevropa Ittifoqi davlatlari va AQSHni Ukrainadagi mojarodan ikki yil oldin G‘arb xavfsizligiga tahdidlarning tez o‘sib borayotgani haqidagi ogohlantirishlariga quloq solmagani uchun yana bir bor qoraladi. U yana bir bor G‘arb davlatlarini qurollanishga, resurslarni ayamasdan, Kiyevga imkon qadar ko‘proq qurol yetkazib berishga chaqirdi.