BMT vakili O‘zbekistonni tark etyapti

To‘rt yarim yillik faoliyatidan so‘ng Birlashgan Millatlar Tashkilotining O‘zbekistondagi taraqqiyot dasturining (BMTTD) doimiy vakili Matilda Dimovska mamlakatdagi missiyasini yakunlayapti. Bu haqida Tashqi ishlar vaziri Baxtiyor Saidov xabar berdi.

“Matilda Dimovska xonim bilan xayrlashuv uchrashuvini o‘tkazdik. BMTTD bilan yaqin hamkorlik va aniq natijalarga erishishga qo‘shgan hissasi uchun o‘z minnatdorchiligimizni bildiramiz. O‘zbekiston Barqaror rivojlanish maqsadlariga erishishga sodiqdir”, degan Saidov.

Shuningdek, Matilda Dimovska O‘zbekiston hukumati va rivojlanish bo‘yicha hamkorlariga qo‘llab-quvvatlovdan minnatdor ekanini aytgan.

“BMTTD rivojlanish sohasidagi global sa’y-harakatlarni ilgari surishga sodiq qoladi va O‘zbekistonda barqaror, inklyuziv va farovon jamiyat barpo etishni qo‘llab-quvvatlashda davom etadi”, degan Matilda Dimovska.

Ma’lumot uchun, BMTTD o‘zining O‘zbekistondagi ilk faoliyatini 1993 yilda boshlagan hamda keyingi bir necha o‘n yillik davr mobaynida milliy hukumat, tadbirkorlik hamjamiyati, fuqarolik jamiyati va ilmiy doiralar bilan hamkorlikda yuzlab loyihalarni amalga oshirgan. U hukumat bilan uchta asosiy yo‘nalish — barqaror ijtimoiy va iqtisodiy rivojlanish, davlat boshqaruvi, iqlim o‘zgarishiga moslashish va atrof-muhitni muhofaza qilish sohalarida hamkorlik qilib keladi.

Eslatib o‘tamiz, avvalroq Prezident Serdar Berdimuhamedov Turkmanistonning O‘zbekistondagi Favqulodda va Muxtor elchisi Yazguli Mammedovni lavozimidan ozod etgan edi. Shuningdek, Buyuk Britaniyaning O‘zbekistondagi elchisi Timoti Torlot diplomatik missiyasini yakunlab, uning o‘rnigaTashqi ishlar vazirligida Sharqiy O‘rta yer dengizi departamenti boshlig‘i vazifasida ishlab kelgan Timoti Smart tayinlangandi. Shu bilan birga, Vengriyaning O‘zbekistondagi elchisi Gyula Kovach diplomatik missiyasini yakunlagandi.