Guterrish dunyo davlatlarini navbatdagi pandemiyaga tayyorlanishga chaqirdi

Birlashgan Millatlar Tashkiloti Bosh kotibi hozirgi pandemiyadan saboq olishga va kelajakda shunga o‘xshash favqulodda vaziyatlarga tayyor bo‘lishga chaqirdi. 27 dekabr – Xalqaro epidemiyaga qarshi tayyorgarlik kuni munosabati bilan qilgan murojaatida Guterrish virus bir necha million kishining hayotiga zomin bo‘lganini, kasallanganlar soni esa yuzlab millionlarga yetganini eslatdi. 

Ayrim iqtisodlar vayron bo‘ldi, sog‘liqni saqlash tizimlari og‘ir sharoitda ishladi va moliyaviy yo‘qotishlar trillionlab AQSH dollarini tashkil etdi. 

Barqaror rivojlanish maqsadlariga erishishda rejalashtirilgan sur’atlardan ortda qolish kuzatilmoqda. Shu bilan birga, rivojlanayotgan mamlakatlar, BMT Bosh kotibi ta’kidlaganidek, o‘z holiga tashlandi: ularga vaksinalar, diagnostika va davolash vositalari bilan ta’minlash uyalmay rad etildi. 

“COVID-19 insoniyat duch keladigan oxirgi epidemiya yoki pandemiyadan uzoqdir. Global hamjamiyat sifatida biz COVID-19  dan og‘ir saboq olishimiz va pandemiyaga tayyorgarlik ko‘rish, oldini olish va nazorat qilish uchun ko‘proq mablag‘ sarflashimiz kerak”, deya qo‘shimcha qildi BMT rahbari. 

Antoniu Guterrishning so‘zlariga ko‘ra, bugungi kunda yuqori epidemiya salohiyatiga ega viruslarni aniqlash va ularning tarqalishini kuzatish uchun har qachongidan ham samaraliroq epidemiologik nazorat mexanizmlari zarur. Birlashgan Millatlar Tashkiloti rahbari ta’kidlaganidek, sog‘liqni saqlash tizimlari yanada chidamli va zarbalarga tayyor bo‘lishi kerak, shu jumladan yaxshi o‘qitilgan, yaxshi jihozlangan va yaxshi maosh oladigan tibbiyot xodimlari. 

“Shuningdek, biz barcha mamlakatlar vaksinalar, davolash-diagnostika va hayotni saqlab qoluvchi texnologiyalardan teng foydalanish imkoniyatiga ega bo‘lishini ta’minlashimiz kerak”, deydi Bosh kotib.  

Pandemiyaga qarshi kurashni alohida davlatlar darajasida olib borib bo‘lmasligini ta’kidlagan BMT rahbari bu kurashda xalqaro hamjamiyat hamjihatlik ko‘rsatishi kerakligini ta’kidladi.  

“Bugun, Xalqaro epidemiyaga tayyorgarlik kuni sifatida men barcha mamlakatlarni dunyo hamjamiyatini salomatlik bilan bog‘liq bo‘lajak muammolarga qarshi turishga tayyor bo‘lishi uchun sa’y-harakatlarimizni qo‘llab-quvvatlashga chaqiraman”, deydi Guterrish.