Biz ertaga kuchli jamoaligimizni isbotlaymiz – Jaloliddin Masharipov

19 noyabr kuni bo‘lib o‘tadigan Jahon chempionati saralashi 6-turi doirasidagi Shimoliy Koreya-O‘zbekiston o‘yini oldidan Jaloliddin Masharipov o‘z fikrlari bilan o‘rtoqlashdi.

“Mashg‘ulot maydoni bilan bog‘liq kichik muammolar bo‘lgani bor gap, lekin hozir bunga e’tibor beradigan vaqt emas. Ertaga o‘zimizning eng yaxshi o‘yinlarimizdan birini ko‘rsatib, 3 ochkoni qo‘lga kiritish uchun bu yerga keldik. Oldimizdagi birinchi vazifa faqat g‘alaba qozonishdir”, deydi Masharipov.

Shuningdek, Masharipov Qatar bilan o‘yindagi mag‘lubiyat unutilib, futbolchilar tomonidan bor e’tibor bo‘lajak bahsga qaratilayotganini bildirdi. 

“Biz kuchli terma jamoamiz va buni yaxshi ko‘ramiz. Qatar bilan o‘yindagi mag‘lubiyatni esdan chiqarib, Shimoliy Koreya bilan bahsda e’tibor qaratish kerakligini yigitlar bilan gaplashib oldik. Kuchli jamoa ketma-ket 2 ta o‘yinda mag‘lub bo‘lmaydi va biz ertaga kuchli jamoa ekanligimizni isbotlaymiz”, deydi futbolchi.

Eslatib o‘tamiz, avvalroq O‘zbekiston milliy terma jamoasi bosh murabbiyi Srechko Katanets Laosda tayyorgarlik uchun ajratilgan maydon holati yomonligini bildirgandi.