Bitkoin narxining tarixiy rekordi yangilandi 

Bitkoin kriptovalyutasi narxi tarixiy rekordni yangiladi va birinchi marta 67 ming dollardan oshdi. Bu haqda savdo ma’lumotlari darak bermoqda.  

Binance birjasida bitkoin Toshkent vaqti bilan 04:25 holatiga ko‘ra, 7,5 foizga o‘sgan — 67,63 ming dollargacha. CoinMarketCap portali ma’lumotlariga ko‘ra, bitkoin 7,29 foizga qimmatlashgan — 67,6 ming dollar. 

Dunyodagi eng ommabop kriptovalyuta narxi rekord darajaga qaytdi va yana bir bor o‘zining eng yuqori ko‘rsatkichini yangiladi. Joriy yilning 20 oktyabrida o‘rnatilgan avvalgi rekord roppa-rosa 67 ming dollarni tashkil etgan bo‘lsa, undan oldin maksimal ko‘rsatkichga aprel oyida erishilgan edi — 64,85 ming dollar. 

Bitkoin ikkinchi oy ketma-ket qimmatlashmoqda, o‘tgan oy kriptovalyuta taxminan 40 foizga qimmatlashib, 43,82 ming dollardan 61,3 ming dollargacha ko‘tarildi. Sentyabr oyida esa ikki oylik kuchli o‘sishdan so‘ng bitkoin biroz arzonlashdi — deyarli 35 foizga. 

Bitkoin may oyida o‘z qiymatining deyarli uchdan bir qismini yo‘qotdi, o‘shanda uning narxi 57,7 ming dollardan 37,3 ming dollarga tushdi. 

Bitkoin – bu blokcheyn texnologiyasiga asoslangan, shu tizimda ishtirok etuvchi har qanday foydalanuvchi tomonidan “qazib olinishi” (chiqarilishi) mumkin bo‘lgan kriptovalyuta. Buning uchun tizimning yangi bloklarini yaratish kerak bo‘ladi.