“Barselona” Levandovski bilan kelishuvga erishdi – OAV

Ispaniyaning “Barselona” futbol klubi “Bavariya” hujumchisi Robert Levandovski bilan shaxsiy kelishuvga erishdi. Bu haqda “Goal” nashri xabar berdi.

Manbaning xabariga ko‘ra, polshalik hujumchi “Bavariya”ni tark etib, Kataloniya klubiga o‘tishni xohlaydi. Biroq nemis klubi o‘zining eng yaxshi to‘purar hujumchisini saqlab qolishni istaydi. Shunday ekan “ko‘k anorranglilar” birinchi navbatda “Bavariya” rasmiylarini rozi qilishi kerak bo‘ladi.

“Barselona” joriy yilning yozida polshalik hujumchini “Kamp Nou”ga olib kelish uchun 60 million yevro (50 million funt/66 million dollar) to‘lashga tayyor ekanligini bildirgan.

Ma’lumot o‘rnida, 33 yoshli Robert Levandovski joriy mavsumda “Bavariya” tarkibida 37 ta uchrashuvda maydonga tushib, 45 ta gol urdi va 4 ta golli uzatma amalga oshirdi. “Transfermarkt” portali Robertni 50 million yevroga baholamoqda. Uning nemis jamoasi bilan amaldagi shartnomasi 2023 yilning yoziga qadar mo‘ljallangan.

Ma’ruf Abdumalikov