“Barselona” Karim Adeyemi transferini e’lon qildi

Ispaniyaning “Barselona” klubi Germaniyaning “Borussiya Dortmund” jamoasi hujumchisi Karim Adeyemini o‘z safiga qo‘shib olganini rasman e’lon qildi. Bu haqda klub matbuot xizmati xabar berdi.

Klub bayonotida aytilishicha, “Barselona” va “Borussiya Dortmund” futbolchining transferi bo‘yicha to‘liq kelishuvga erishgan. Adeyemi kataloniyaliklar bilan 2031 yilgacha amal qiladigan shartnoma imzolagan.

2002 yil 18 yanvar kuni Myunxen shahrida tug‘ilgan Adeyemi otasi nigeriyalik va onasi ruminiyalik bo‘lishiga qaramay, xalqaro maydonda Germaniya terma jamoasi sharafini himoya qiladi.

“U faoliyati davomida qanotlarda ham, markaziy hujumchi sifatida ham samarali harakat qila olishini namoyish etdi. Uning yuqori tezligi va kuchli chap oyog‘i jamoamiz hujumi uchun muhim ustunlik bo‘ladi”, deyiladi klub bayonotida.

Ma’lumot uchun, 2025-2026 yilgi Bundesliga mavsumida 24 yoshli Adeyemi 28 ta uchrashuvda maydonga tushib, 7 ta gol urdi va 4 ta golli uzatmani amalga oshirdi.

Shuningdek, u Chempionlar ligasining 9 ta uchrashuvida ishtirok etib, 3 ta gol va 2 ta golli uzatma muallifi bo‘ldi.