Astraxanda ko‘p qavatli uyning bir qismi qulab tushdi (video)

Rossiyaning Astraxan shahrida ko‘p qavatli uyning kirish qismi qulab tushdi. Bu haqda bugun, 28 iyul kuni Rossiya fuqarolik mudofaasi, favqulodda vaziyatlar va tabiiy ofatlar oqibatlarini bartaraf etish vazirligi xabar berdi.

Vazirlik qulashga nima sabab bo‘lganiga aniqlik kiritmadi.

“Rossiya Favqulodda vaziyatlar vazirligi xodimlari tuzilmalarni demontaj qilishmoqda, aholini evakuatsiya qilishmoqda va mumkin bo‘lgan qurbonlarni qidirmoqda", - deyiladi xabarda.

Dastlabki ma’lumotlarga ko‘ra, kamida uch kishi jarohatlangan. Binodan 22 kishi evakuatsiya qilingan. Favqulodda vaziyatlar vazirligi xabarida aytilishicha, “birinchi qavatdan beshinchi qavatgacha bo‘lgan xonadonlarning bir qismi yong‘inlarsiz qulab tushgan”. Qutqaruvchilar vayronalarni qo‘lda tozalamoqda.

“Baza” Telegram-kanali Favqulodda vaziyatlar vazirligidagi manbalarga tayanib, qisman qulagan bino 2020 yilda xavfli deb topilganini yozdi.

TASS agentligining xabar berishicha, Favqulodda vaziyatlar vazirligi dastlabki versiya sifatida maishiy gaz portlashi ustida ishlamoqda. 25 iyul kuni maishiy gaz portlashidan so‘ng Saratovdagi o‘n qavatli turarjoy binosiga kirish eshigi qulab tushgandi. 7 kishi halok bo‘lgani va 16 kishi yaralangani xabar qilingan.

Ma’lumot uchun, 2024 yil boshida Rossiyada 1 milliondan ortiq odam avariyadagi uylarda yashagan. Rossiya Federatsiyasi Tergov qo‘mitasining o‘sha paytdagi xabariga ko‘ra, ularning uchdan bir qismi bunday uylarda besh yildan ortiq yashagan.