Angrenda o‘qituvchilar kechasi ko‘mir tashigani aytildi

Ijtimoiy tarmoqlarda Toshkent viloyati Angren shahridagi 39-sonli maktabda o‘qituvchilar yarim kechasi ko‘mir tashigani haqida xabarlar tarqaldi. Ushbu holatga viloyat Maktabgacha va maktab ta’limi boshqarmasi munosabat bildirdi.

Ma’lum qilinishicha, mazkur ta’lim muassasasiga joriy yilning noyabr oyida Prezidentning 57-sonli qarori ijrosini ta’minlash maqsadida maktabgacha va umumta’lim tashkilotlarini kuz-qish mavsumiga hozirlash, xususan ko‘mir yoqilg‘isini yetkazib berish ishlari amalga oshirilgan.

Viloyat Maktabgacha va maktab ta’limi boshqarmasiga ko‘ra, maktabga shu yilning 11 noyabrida tunda ko‘mir yoqilg‘isi kelib tushgan. Maktab ma’muriyati, xodimlar va maktab atrofidagi aholi yordamida shu kunning o‘zida, ularning o‘z tashabbusi bilan yog‘in-sochinga qoldirmay ko‘mirni maxsus qurilgan omborga kiritib olishgan.

Xabardagi videoni muassasa rahbariyati, minnatdorlik sifatida suratga olib maktabning Telegram guruhiga tashlagan.

“Bu videodan esa bir oy o‘tib, ba’zi g‘araz niyatli shaxslar butkul boshqa maqsadda foydalangan. Mazkur ta’lim muassasasida hech qanday majburiy mehnat sodir etilmagan”, deyiladi viloyat Maktabgacha va maktab ta’limi boshqarmasi munosabatida.