AQSHda TikTok faoliyati to‘xtatildi

Bugun, 19 yanvar kuni taqiq kuchga kirgunga qadar TikTok AQSHda faoliyatini to‘xtatdi. Bu haqda BBC xabar berdi.

Ilovani ochishga urinayotganda, foydalanuvchilar TikTok mavjud emasligi haqidagi xabarni ko‘radi.

“AQSH TikTok'ni taqiqlovchi qonunni qabul qildi. Afsuski, bu siz hozir TikTok'dan foydalana olmasligingizni anglatdi. Prezident Tramp lavozimga kirishgach, tarmoqni tuzatish bo‘yicha biz bilan hamkorlik qilishini aytganidan xursandmiz. Iltimos, yangilanishlarni kuzatib boring”, deyiladi ilovada.

Bir kun avval Donald Tramp NBC News va ABC telekanallariga TikTok'ga 90 kunlik muhlat berish niyatida ekanini aytdi. AQSHning saylangan prezidenti inauguratsiyadan so‘ng tegishli bayonot bilan chiqishga va’da berdi.

“Ehtimol, men 90 kunga uzaytiraman – sizda 90 kunlik uzaytirish bor, ehtimol siz buni bilasiz. Biror narsani aniqlamagunimizcha men buni qilishda davom etaman”, dedi Tramp ABC News telekanaliga.

2024 yilning aprel oyida AQSH Kongressi ByteDance platformasini Amerika kompaniyasiga sotish majburiyatini yuklovchi qonunni qabul qildi. Unga ko‘ra, 2025 yil 19 yanvardan boshlab ijtimoiy tarmoq taqiqlanishi kerak edi.

Amerika rasmiylariga ko‘ra, Xitoy kompaniyasiga tegishli TikTok Pekinga amerikaliklar haqida ma’lumot to‘plash va jamoatchilik fikriga ta’sir o‘tkazish imkonini beradi.

10 yanvar kuni AQSH Oliy sudida bo‘lib o‘tgan sud majlisida TikTok va kontent yaratuvchilarni himoya qiluvchi advokatlar ushbu taqiq platformaning 170 milliondan ortiq AQSH foydalanuvchilari uchun so‘z erkinligini buzish ekanini aytdi.

TikTok Xitoy Kommunistik partiyasi kompaniyadan Xitoy manfaatlarini targ‘ib qilish va targ‘ibot qilish uchun foydalanayotganini bir necha bor rad etgan. O‘tgan yilning dekabr oyida AQSHning saylangan prezidenti Donald Tramp sudni masalaga “siyosiy yechim” topishga urinib ko‘rish uchun Oq uyga qaytguniga qadar qarorni kechiktirishga chaqirgan edi.

“TikTok bo‘yicha qarorim yaqin orada qabul qilinadi, ammo vaziyatni tahlil qilishga vaqtim bo‘lishi kerak”, deb yozgan Tramp 17 yanvar kuni Truth Social sahifasida.

Oq uy qonunni amalga oshirish haqiqatan ham 20 yanvarda lavozimga kirishadigan Trampga bog‘liqligini tasdiqlaydi.

TikTok Bosh direktori Shou Zi Chu har doim platformaning bir qismini sotishga qarshi bo‘lsa-da, potensial xaridorlar saf tortishda davom etmoqda. “Bloomberg”ning yozishicha, kompaniya TikTok'ni milliarder Ilon Maskga sotishni ko‘rib chiqmoqda.

Xaridga AQSHning sobiq moliya vaziri (Trampning birinchi prezidentligi davrida) Stiven Mnuchin va milliarder Frenk Makkort va boshqalar qiziqish bildirgan.

Eslatib o‘tamiz, avvalroq saylovoldi kampaniyasi davomida TikTok’ni himoya qilishga va’da bergan Donald Tramp AQSHda uni taqiqlash rejasiga qarshi chiqmoqchiligini aytgandi.