AQSH yadroviy aviatashuvchisi savdo kemasi bilan to‘qnashdi

AQSH Harbiy-dengiz kuchlariga tegishli yadro reaktorida ishlovchi USS Harry S. Truman aviatashuvchisi O‘rtayer dengizida – Misr yaqinida “Beshiktash-M” savdo kemasi bilan to‘qnashdi. Bu haqda AQSH Harbiy-dengiz floti vakiliga tayanib, CNN xabar berdi. 

To‘qnashuv sabablari hozircha noma’lum, ammo flot vakilining so‘zlariga ko‘ra, hodisa USS Harry S. Truman bortiga suv chiqishiga olib kelmagan va uning yadro tizimiga zarar yetmagan. Hozircha ikkala kemada ham jabrlanganlar borligi haqida ma’lumot yo‘q, biroq Panama bayrog‘i ostida suzuvchi “Beshiktash-M” ma’lum darajada shikastlangani xabar qilinmoqda.

Hodisa yuzasidan tergov boshlangan bo‘lib, to‘qnashuv tafsilotlari aniqlanmoqda. Ma’lumki, voqea sodir bo‘lgan hudud yuk kemalarining yuqori harakati bilan tavsiflanadi. Hodisa paytida ushbu mintaqada taxminan 100 ta kema bo‘lgan, bu esa murakkab navigatsiya sharoitini yuzaga keltirgan. “Beshiktash-M” Suvaysh kanalidan o‘tib, Ruminiyaga qarab harakatlanayotgan bo‘lsa, USS Harry S. Truman ham kanal tomon yo‘l olayotgan bo‘lgan.

Dengiz ishlari bo‘yicha ekspert Sel Merkolyanoning so‘zlariga ko‘ra, ushbu hududda manyovr qilish imkoniyati cheklangan. U bunday tor dengiz bo‘g‘ozlarida har qanday navigatsion xato og‘ir oqibatlarga olib kelishi mumkinligini ta’kidladi. AQSH harbiy-dengiz kuchlari sobiq kapitani Karl Shuster esa bunday sharoitda kemalarning harakat uchun joyi juda oz bo‘lishi, noto‘g‘ri baholangan qarorlar esa to‘qnashuv ehtimolini keskin oshirishi mumkinligini aytgan.

Bungacha USS Harry S. Truman ikki oy davom etgan harbiy operatsiyalardan so‘ng Gretsiyaning Suda ko‘rfazida texnik to‘xtash amalga oshirgan. Ushbu operatsiyalar davomida u Yamandagi husiylarga hamda Somalida ISHID guruhiga qarshi aviatsion zarbalar bergan. 

AQSH Harbiy-dengiz kuchlari ma’lumotlariga ko‘ra, USS Harry S. Truman AQSH flotidagi 11 ta aviatashuvchidan biri bo‘lib, u odatda esminets va boshqa harbiy kemalardan iborat zarba guruhlari tomonidan himoyalanadi. 

Ekspertlarning fikricha, harbiy kemalar va savdo kemalari o‘rtasidagi bunday to‘qnashuvlar juda kam uchraydi, chunki aviatashuvchilar odatda yaxshi muvofiqlashtirilgan zarba guruhlari tarkibida harakatlanadi. Biroq Suvaysh kanalidan o‘tish qoidalariga ko‘ra, barcha kemalar faqat navbat bilan harakatlanishi lozim, bu esa ularni to‘qnashuv ehtimoli yuqori bo‘lgan holatga yuzlashtiradi.

Ma’lumot uchun, shu kabi hodisa AQSH harbiy floti tarixida ilgari ham sodir bo‘lgan. 2004 yilda Fors ko‘rfazida yelkanli Dhau nomli kema USS John F. Kennedy aviatashuvchisi bilan to‘qnashgan.

Bundan tashqari, 2017 yilda AQSH Harbiy-dengiz kuchlariga tegishli ikkita esminets halokatli to‘qnashuvlarga uchragan – USS Fitzgerald 2017 yil iyun oyida Yaponiyaga yaqin hududda yuk kemasi bilan to‘qnashib, 7 nafar harbiy halok bo‘lgan. USS John S. McCain 2017 yil avgust oyida Singapur va Malayziya yaqinida tanker bilan to‘qnashib, 10 harbiy halok bo‘lgan.

Eslatib o‘tamiz, avvalroq Rossiyaning “Ursa Mayor” yuk kemasi O‘rtayer dengizida Ispaniya va Jazoir o‘rtasida cho‘kib ketgan edi. Rossiyaning “Ursa Mayor” yuk kemasi O‘rtayer dengizida Ispaniyaning Agilas va Jazoirning Oran shahri oralig‘ida cho‘kib ketgan edi. Kema bortidagi 16 dengizchidan 14 nafari Kartagena portiga olib ketilgan. Yana ikkitasi bedarak yo‘qolgan.