AQSH kosmosga Ukrainadagi urushning sifatli tasvirini olish uchun raketa jo‘natdi 

Kecha, 1 iyul kuni Amerikaning “United Launch Alliance” kompaniyasi kosmosga yuqoridan Ukrainadagi jang maydonining yuqori sifatli tasvirini olish uchun ikkita sun’iy yo‘ldoshga ega Atlas V raketasini uchirdi. Bu haqda kompaniya veb-saytida ma’lum qilingan. 

Qayd etilishicha, “Energomash” (Roskosmosning bir qismi) tomonidan ishlab chiqilgan, Rossiyaning RD-180 dvigateli bilan jihozlangan raketa Kanaveral burnidagi (Florida) kosmodromdan AQSHning Sharqiy qirg‘og‘i vaqti bilan soat 19:15 da uchirilgan. 

Dastlab, raketani uchirish joriy yilning 30 iyun kuni bo‘lib o‘tishi kerak edi, biroq bulutli va yaqinlashib kelayotgan momaqaldiroq tufayli jarayon bir kunga kechiktirilgan.

Raketa bortida ikkita qurilma mavjud bo‘lib, ulardan biri –  WFOV sun’iy yo‘ldoshi infraqizil datchik bilan jihozlangan va AQSH harbiylariga jang maydonining yuqori sifatli tasvirini olishga imkon beradi. 

USSF-12 Ring deb nomlangan ikkinchi qurilmaning maqsadi faqatgina kelajak texnologiyalarini namoyish qilish. Ikkala sun’iy yo‘ldosh ham ekvatordan taxminan 36 000 kilometr balandlikda geostatsionar orbitada bo‘ladi.