3 ta viloyatda elektr ta’minotida uzilishlar kuzatilmoqda

Navoiy, Jizzax va Andijon viloyatlarining ayrim hududlarida elektr ta’minotida uzilishlar kuzatilmoqda. Bu haqda Energetika vazirligi ma’lum qildi.

Navoiy va Jizzax viloyatlarida kuzatilayotgan kuchli shamol tufayli elektr tarmoqlarida nosozliklar yuzaga kelmoqda. Buning oqibatida Jizzax viloyatining  Forish, Zafarobod va Sharof Rashidov, Navoiy viloyatining Nurota, Tomdi va Uchquduq tumanlarining ayrim hududlarida elektr ta’minotida uzilishlar kuzatilmoqda.

Shuningdek, Andijon viloyatining Marhamat, Buloqboshi va Asaka tumanlarini elektr energiyasi bilan ta’minlovchi yuqori kuchlanishli elektr uzatish tarmog‘ida nosozlik yuzaga kelgan.

Oqibatda ushbu tumanlarning ayrim hududlarida elektr energiyasi ta’minotida favqulodda uzilishlar kuzatilmoqda.

“Hozirda maxsus brigadalar tomonidan nosozliklarni bartaraf etish choralari ko‘rilmoqda va tez fursat ichida ushbu hududlarning elektr ta’minoti to‘liq tiklanadi. Keltirilgan noqulayliklar uchun iste’molchilardan uzr so‘raymiz”, deyiladi vazirlik xabarida.