23 yoshli ayolni Rossiyaga fohishalikka yubormoqchi bo‘lgan erkak jazolandi

Jizzax viloyati Do‘stlik tumanida 29 yoshli erkak 23 yoshli ayolni Rossiyaga sotib yubormoqchi bo‘lgan vaqtida qo‘lga olindi. U sud hukmi bilan jazolandi. Bu haqda Oliy sud matbuot kotibi Aziz Obidov ma’lum qildi.

Bildirilishicha, erkak o‘ziga notanish bo‘lgan ayolni Rossiyaga fohishalik qilish maqsadida sotib yubormoqchi bo‘lganida ushlangan. Mazkur holat Jinoyat ishlari bo‘yicha Do‘stlik tumani sudida ko‘rib chiqilgan.

“Aybimga iqrorman va qilgan ishimdan pushaymonman. Oilada yagona boquvchiman. Xotinim homilador. Bir nafar voyaga yetmagan farzandim bor. Suddan yengillik so‘rayman”, degan erkak sud majlisida.

Jinoyat ishlari bo‘yicha Do‘stlik tumani sudi erkakni Jinoyat kodeksining 135-moddasi 1-qismi (Odam savdosi) bilan aybli deb topdi. Unga nisbatan 3 yil 6 oy muddatga ozodlikni cheklash jazosi tayinlandi.

Eslatib o‘tamiz, avvalroq Toshkent aeroportida ikki qizni chetga fohishalikka yubormoqchi bo‘lgan ayol ushlangandi.

Mohimbegim Ma’rufaliyeva