2022 yildagi eng qimmat avtoraqamning narxi ma’lum bo‘ldi

O‘zbekistonda 2022 yilda eng qimmatga sotilgan avtoraqam 348 million so‘mni tashkil qilgan. Bu haqda Respublika tovar-xom ashyo birjasi xabar berdi.

Qayd etilshicha, o‘tgan yilda Respublika tovar-xom ashyo birjasining avtoraqam.uzex.uz elektron savdo tizimida 304,1 mlrd so‘mlik 118 mingdan ziyod avtoraqam shaffof onlayn-auksionlar orqali sotilgan. Tuzilgan bitta bitimning o‘rtacha qiymati 2,6 mln so‘mni tashkil etgan. Sotilgan avtoraqamlarning 91 foizi jismoniy shaxslar, 9 foizi yuridik shaxslar tomonidan xarid qilingan. O‘tgan davrda sotilgan avtoraqamlarning eng past bahosi 494,9 ming so‘mni, eng qimmat avtoraqamning qiymati esa 348 mln so‘mni tashkil qildi.

Raqobatli savdolar natijasida bitimlarning 5 foizi birinchi toifadagi avtoraqamlar, 8 foizi ikkinchi, 8 foizi uchinchi, 11 foizi to‘rtinchi, 22 foizi beshinchi va 46 foizi oltinchi toifa avtoraqamlarga to‘g‘ri kelgan.

Hududlar kesimida eng ko‘p avtoraqamlar Toshkent shahri va Toshkent viloyati 31%, Samarqand va Qashqadaryo 8 foizdan, Namangan, Andijon va Surxandaryo 7 foizdan hamda Xorazm 6 foiz viloyatlarida xarid qilingan.

Ma’lumot uchun, avtoraqamlarni onlayn-auksionlarda sotilishidan kelib tushgan mablag‘larning 80 foizi O‘zbekiston Respublikasi Davlat budjetiga, 20 foizi esa O‘zbekiston Respublikasi Ichki ishlar vazirligining moddiy-texnik bazasini rivojlantirish, xodimlarini moddiy rag‘batlantirish va boshqa xarajatlar Maxsus jamg‘armasiga yo‘naltiriladi.

Ozoda Choriyeva