100 nafar ekspert Shavkat Mirziyoyevning 15 ta muhim islohotini aniqladi

100 nafar mahalliy va xorijiy ekspertlar so‘nggi besh yilda O‘zbekiston Prezidenti Shavkat Mirziyoyev tashabbusi bilan amalga oshirilgan eng muhim 15 islohotni aniqlab berdi.

“Yuksalish” umummilliy harakati o‘tkazgan ushbu global so‘rov natijalariga ko‘ra, Prezident Shavkat Mirziyoyevning tarixiy ahamiyatga molik 15 ta muhim islohoti shakllantirildi. Ekspertlar fikricha, O‘zbekiston yetakchisining eng muhim islohoti bu — Markaziy Osiyoda yaxshi qo‘shnichilik munosabatlarining o‘rnatilgani, chegaralar ochilgani va nazorat punktlari tashkil etilgani hamda Markaziy Osiyo davlatlari bilan barcha masalalar bo‘yicha konstruktiv muloqot yo‘lga qo‘yilganidir.

Shavkat Mirziyoyevning 15 ta muhim islohoti:

1. Markaziy Osiyoda yaxshi qo‘shnichilik munosabatlarining o‘rnatilgani, chegaralar ochilishi va nazorat punktlari tashkil etilishi;
2. Valyuta bozorining erkinlashtirilishi, naqd pul bilan bog‘liq muammolar bartaraf etilishi;
3. Davlat xizmatlari tizimining rivojlantirilishi, Davlat xizmatlari markazlarining ishga tushirilishi, ortiqcha byurokratiyaga barham berilishi;
4. Turizmni rivojlantirish doirasida 90 mamlakat uchun vizasiz rejim, 48 mamlakat fuqarolari uchun vizasiz tranzit rejimi joriy etilishi;
5. Inson huquqlari kafolatlarining kuchaytirilishi, majburiy mehnat, shu jumladan bolalar mehnatining tugatilishi;
6. Aholi murojaatlari bilan ishlash va davlat organlarining ochiqligi bo‘yicha yangi tizimning joriy etilishi;
7. Media muhitning kengaytirilishi: OAVning jamiyatdagi, muhim hukumat qarorlar qabul qilinishidagi rolining oshirilishi;
8. Gender siyosatini yangi bosqichga olib chiqilganligi, xususan Respublika Gender komissiyasining tashkil etilishi;
9. Oliy ta’lim tizimining rivojlantirilishi: universitetlarga qabul kvotalarining oshirilishi, milliy va xorijiy OTMlar filiallarining ochilishi;

10. Tadbirkorlik muhiti yaxshilanishi, xususan biznesni ro‘yxatdan o‘tkazish va uni yuritish bo‘yicha jarayonlar soddalashtirilishi;
11. Kambag‘allikni rasmiy darajada tan olinganligi va uni qisqartirish bo‘yicha kompleks yondashuv shakllanishi;
12. Korrupsiyaga qarshi kurashish sohasida huquqiy va institutsional o‘zgarishlarning amalga oshirilishi;
13. Yoshlarni qo‘llab-quvvatlashning yangi tizimi joriy etilishi;
14. O‘zbekistonda 15 yil davomida doimiy yashovchi fuqaroligi bo‘lmagan shaxslar to‘g‘ridan-to‘g‘ri fuqarolikka qabul qilish tartibining joriy etilishi
15. Orol dengizining suvi qurigan tubida o‘rmon barpo qilinishi.

BMT qoshida Orol dengizi mintaqasida Inson xavfsizligi bo‘yicha Trast fondining ishga tushirilishi, BMT Bosh assambleyasi Orolbo‘yi mintaqasini ekologik innovatsiyalar va texnologiyalar hududi deb e’lon qilish to‘g‘risidagi maxsus rezolyutsiyaning qabul qilinishi.

Ma’lumot o‘rnida, global so‘rovda taniqli xorijiy ekspertlar, jumladan, Fransiya tashqi siyosat markazi prezidenti Faben Baussart, Xolon texnologiya universiteti prezidenti Eduard Yakubov, Vaseda universitetining Markaziy Osiyo bo‘yicha bosh tadqiqotchisi Naoki Nixey, Qozog‘iston strategik tadqiqotlar instituti direktori o‘rinbosari Sanat Kushkumbayev, Konrad Adenauer nomidagi jamg‘armaning Markaziy Osiyodagi vakolatxonasi rahbari Ronni Xayne, Xalqaro xususiy tadbirkorlik markazi mintaqaviy direktori o‘rinbosari Erik Xonts, “Amerika ovozi” muxbiri Navbahor Imomova, “The Guardian”, “The Economist”, “Independent Newspaper” nashrlari muxbiri Joanna Lillis, “Mintaqaviy muloqot” xalqaro nodavlat tashkiloti direktori Myusha Sever, London va Dubayning “Diplomat Business Club” ishbilarmonlik klubi raisi Mansur Malik va boshqa qator mamlakatlarning davlat va jamoat arboblari ishtirok etdi.

Eslatib o‘tamiz, 2019 yilda o‘tkazilgan ekspertlik so‘rovida davlat rahbarining 10 ta eng muhim tashabbusi ovoz berish orqali aniqlangandi.