Toshkentda 18 yoshli talaba qiz terrorizmda ayblanib, 5 yilga “kesildi”

Ijtimoiy tarmoqda Toshkentda 18 yoshli qiz 4 yilga qamalgani, prokuror ham suddan yengillik berishini so‘raganida sudiya unga yengillik bermagani haqida xabarlar tarqaldi. Holat yuzasidan Toshkent shahar sudlari izoh berdi.

Ma’lum qiliniishicha, Jinoyat ishlari bo‘yicha Yunusobod tuman sudining joriy yil 18 avgustdagi hukmiga ko‘ra D.Jumayeva (2004 yilda Toshkent shahrida tug‘ilgan) Jinoyat kodeksining 155-2-moddasi (terrorchilik faoliyatini amalga oshirish maqsadida o‘quvdan o‘tish, chiqish yoki harakatlanish) 1-qismi, 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandi va 244-2-moddasi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) 1-qismi bilan aybli, deb topilib, unga uzil-kesil o‘tash uchun 5 yil 3 oy muddatga ozodlikdan mahrum qilish jazosi tayinlangan.

Toshkent shahar sudi jinoyat ishlari bo‘yicha sudlov hay’ati apellyatsiya instansiyasining joriy yil 18 oktyabrdagi ajrimiga ko‘ra jinoyat ishlari bo‘yicha Yunusobod tuman sudining 18 avgustdagi hukmi o‘zgartirilib, D.Jumayevaning ayblovidan Jinoyat kodeksining 244-1-moddasi 3-qismi “g” bandi chiqarilib, ushbu modda bilan va 59-moddasi tartibida tayinlangan jazo bekor qilingan. D.Jumayevaga Jinoyat kodeksining 244-2-moddasi 1-qismi bilan tayinlangan 5 yil muddatga ozodlikdan mahrum qilish jazosi o‘zgarishsiz qoldirilib, mazkur kodeksning 155-2-moddasi 1-qismi bilan, ushbu kodeksning 57-moddasini qo‘llab, 4 yil 8 oy muddatga ozodlikdan mahrum qilish jazosi tayinlangan. Jinoyat kodeksining 59-moddasiga asosan tayinlangan jazolarni qisman qo‘shish yo‘li bilan D.Jumayevaga uzil-kesil o‘tash uchun 5 yil 2 oy muddatga ozodlikdan mahrum qilish jazosi tayinlangan. Jinoyat kodeksining 62-moddasi tartibida D.Jumayevaning joriy yil 9 apreldan 13 iyunga qadar qamoqda saqlangan har bir kunini ozodlikdan mahrum qilish jazosining bir kuniga tenglashtirib hisoblab, qamoqda saqlangan 2 oy 4 kunni jazo muddatidan chegirib, D.Jumayevaga uzil-kesil o‘tash uchun 4 yil 11 oy 26 kun muddatga ozodlikdan mahrum qilish jazosi qoldirilgan.

“Albatta, endigina 18 yoshga to‘lgan D.Jumayevaga nisbatan ozodlikdan mahrum etish jazosi tayinlanganligi g‘oyatda achinarli. Ijtimoiy tarmoqlarda D. Jumayevaning “oliy o‘quv yurtiga o‘qishga kirganligi, prokuror ham unga yengillik so‘ragani” keng muhokama qilinmoqda. Biroq, shuni unutmaslik lozimki, xoh talaba bo‘lsin, xoh yoshi ulug‘ shaxs bo‘lsin, qonun barchaga barobar, jinoyatga esa jazo muqarrar. O‘z navbatida faol fuqarolik pozitsiyasiga ega bo‘lgan ko‘plab yurtdoshlarimiz aybdorga nisbatan ozodlikdan mahrum etish jazosi tayinlanganiga ham norozilik bildirganlar. Albatta, bunday kuyunchaklik, shu yurt farzandi – D.Jumayevaning taqdiriga befarq bo‘lmaslik tahsinga sazovor holat.

Ammo, D. Jumayeva terrorchilik faoliyatida ishtirok etish uchun xorijga chiqib ketish maqsadida yaqinlaridan xufyona tarzda jomadon xarid qilgan. Joriy yilning 15 martida xorijga chiqish pasportini rasmiylashtirishga erishgan. Ularni o‘z tanishining uyida yashirin ravishda saqlab kelgan. Eng ayanchlisi, 2022 yil 26 mart kuni soat 11:00 da “O‘zbekiston-Turkiya-Suriya” yo‘nalishi orqali Suriyaga borib, terrorchilik tashkiloti faoliyatida ishtirok etish maqsadida harakat qilayotganida fosh etilgan va protsessual tartibda ushlangan. Sud D.Jumayevani ochiqda qoldirish orqali qayta tarbiyalash imkoni mavjud emasligini inobatga olib, ozodlikdan mahrum etish jazosini tayinlagan”, deyiladi rasmiy xabarda.

Qayd etilishicha, D. Jumayevaning jinoyat sodir etishdagi aybi tergov va birinchi bosqich sudi jarayonlarida o‘z aybiga to‘liq iqror bo‘lib bergan ko‘rsatmalari, guvohlarning ko‘rsatmalari, uyali telefon apparatlarini tekshirish uchun olib qo‘yish va ko‘zdan kechirish bayonnomalari, A4 formatidagi 12 dona qog‘oz varag‘iga joylashtirilgan matnli yozishmalar, sud-texnik ekspertizasining xulosalari va unga ilova qilingan DVD+R disklar, Vazirlar Mahkamasi huzuridagi Din ishlari bo‘yicha qo‘mita ekspertlarining sudga oid dinshunoslik ekspertizasining xulosalari hamda jinoyat ishi hujjatlarida mavjud bo‘lgan boshqa ob’ektiv dalillar majmui bilan o‘z isbotini to‘liq topgan.

“Bu bilan D. Jumayevaga oid sud qarorlari endi o‘zgarmaydi, deyishdan mutlaqo yiroqmiz. Zotan, Toshkent shahar sudi tomonidan chiqarilgan ajrimdan norozi taraflar jinoyat-protsessual qonunchiligida belgilangan tartib va muddatlarda Oliy sudga kassatsiya tartibida shikoyat berish yoki protest keltirishga haqli ekanligi ma’lum qilinadi”, deya yakunlangan rasmiy xabar.