Husanov Osiyo va “Lans” tarixidagi eng qimmat transferga aylanadi

Fransiyaning “Lans” klubi markaziy himoyachisi Abduqodir Husanov “Manchester Siti”ga o‘tadigan bo‘lsa, klub va Osiyo qit’asi tarixidagi eng qimmat transfer qilingan futbolchi bo‘ladi.

“Shaharliklar” qishki transferlar oynasida o‘zbekistonlik markaziy himoyachini qo‘lga kiritishga yaqin turibdi. Ma’lum bo‘lishicha, manchesterliklar futbolchi uchun 50 million yevro to‘lashga tayyor va agar mazkur transfer amalga oshsa, Husanov “Lans” tarixidagi eng qimmat transfer qilingan futbolchiga aylanadi. Ayni damga kelib, klub tarixida eng ko‘p mablag‘ga sotilgan futbolchi Luis Openda bo‘lib turibdi. U “Leypsig”ga 40 million yevroga o‘tgan edi. 

Ma’lumot o‘rnida, “Lans” Abduqodir Husanovni 2023 yilda “Energetik-BGU”dan 100 ming yevroga sotib olgandi. Hozirda  Osiyo futboli tarixidagi eng qimmat summaga transfer qilingan futbolchi koreyalik Kim Min Je hisoblanadi. U 2023 yilda “Napoli”dan “Bavariya”ga 50 million yevroga ko‘chib o‘tgan.

Eslatib o‘tamiz, avvalroq, “Manchester Siti” ustozi Pep Gvardiola o‘zbekistonlik himoyachining transferiga rozilik bildirgani haqida xabar berilgan edi.