Husanov ajoyib jismoniy ko‘rsatkichlarga ega – Gvardiola

“Manchester Siti” ustozi Xosep Gvardiola bugun, 22 yanvar kuni bo‘lib o‘tadigan Yevropa Chempionlar ligasi (YeCHL) doirasidagi PSJ bilan o‘yin oldidan matbuot anjumanida qatnashib, jamoasining o‘zbekistonlik himoyachisi Abduqodir Husanov haqida fikr bildirdi.

“Tarkibimizga yangi kelib qo‘shilganga “Siti” oilasiga xush kelibsiz deyman. Ularning jamoaga qo‘shilganidan xursandman. Yangi kelgan yosh o‘yinchilar ko‘p yillar davomida safimizda to‘p tepishini reja qilganmiz.  Husanov Fransiyada o‘ynagan. U ajoyib jismoniy ko‘rsatkichlarga ega va umid qilamanki, ingliz tilini iloji boricha tezroq o‘rganadi. Reys esa braziliyalik futbolchi. Ular Chempionlar Ligasida 1/8 final bosqichiga chiqqanimizdan keyin yordam bera oladi. APLda esa ular hozirdan o‘ynash imkoniga ega”, deydi Gvardiola.

Qayd etish joiz, UEFA qoidalariga ko‘ra, Yevropa Chempionlar ligasi guruh  bosqichi o‘yinlarida “Man Siti”ga yangi kelib qo‘shilganlar turnirda jamoadoshlariga yordam bera olmaydi. Klub pley-off bosqichidan yangi futbolchilarini ro‘yxatdan o‘tkazib, ularni o‘ynatish imkoniyatiga ega bo‘ladi. 

Ma’lumot uchun, “shaharliklar” bugun, 22 yanvar kuni YeCHL 7-turi doirasida safarda PSJga qarshi bahs olib boradi. Ortda qolgan 6 ta turdan keyin ingliz klubi 8 ochko bilan umumiy guruh bosqich turnir jadvalida 24-o‘rinni egallab turibdi.