“Hizbulloh” va Eron Isroilga 150 ta raketa uchirdi

Kecha, 11 mart kuni kechqurun Isroilning shimoliy va markaziy hududlari keng ko‘lamli raketa hujumiga uchradi. Bu haqda “Deutsche Welle” xabar berdi.

Isroil Mudofaa armiyasi ma’lumotiga ko‘ra, mamlakat hududiga “Hizbulloh” tomonidan taxminan 150 ta raketa uchirilgan.

Hujum mahalliy vaqt bilan taxminan 20:00 da boshlangan. Shimol va markaziy shaharlarida havo tahdidi sirenalari yangragan. Hayfada ham dronlar orqali ehtimoliy hujumlar haqida ogohlantirishlar qayd etilgan. Dastlabki ma’lumotlarga ko‘ra, hujumlar oqibatida kamida ikki kishi jarohatlangan.

“Hizbulloh” bayonotida hujumning maqsadi Isroilning harbiy ob’ektlari va chegara hududidagi aholi punktlari bo‘lganligi ta’kidlangan. Harakat vakillari ushbu hududlarda yashovchilardan uylaridan chiqishni so‘ragan.

Isroil harbiylari tez orada Bayrutdagi “Hizbulloh” ob’ektlariga qarshi javob operatsiyasi boshlaganini xabar qilgan. SAHAL ma’lumotiga ko‘ra, havo zarbalari oqibatida harakatning Dahiya hududidagi pozitsiyalari nishonga olingan, bu hudud uning asosiy markazlaridan biri hisoblanadi.

Isroil armiyasi hujumlar davomida harakatning taxminan o‘n shtabi va raketa uchirish qurilmalari nishonga olinganini bildirgan. Livan poytaxti aholisi ijtimoiy tarmoqlarda portlashlar va shaharning bir necha hududida ko‘tarilgan tutunlarni tasvirlovchi videolarni joylashtirgan.

Livandan keyingi hujumlardan so‘ng Isroil harbiylari Eron hududidan balistik raketalar uchirilganini qayd etgan. SAHAL ma’lumotiga ko‘ra, havo mudofaa tizimlari barcha raketalarni yo‘q qilgan.

Keyinchalik Islom inqilobi qo‘riqchilari korpusi bayonot berib, Isroilga hujum “Hizbulloh” bilan hamkorlikdagi va muvofiqlashtirilgan operatsiya ekanligini aytgan. Isroil rasmiylari bu ma’lumotni tasdiqlamagan.

Tun davomida Isroil yana Livandan hujumlarga uchragan. Bu safar uzoq masofali raketalar ishlatilgan. Tel-Aviv va markaziy shaharlarida sirenalar yangragan.

Shuningdek, Eron hududidan yana bir balistik raketa uchirilgani xabar qilingan, undan so‘ng Isroil armiyasi javob zarbalari berilganini e’lon qilgan.

Yaqin Sharqdagi taranglik 28 fevral kuni AQSH va Isroil Eron hududiga keng ko‘lamli havo zarbalarini amalga oshirganidan so‘ng keskin oshdi. Tehron javoban Isroil va Fors ko‘rfazi mamlakatlaridagi AQSHning harbiy ob’ektlarga zarbalar berishni boshladi.

“Hizbulloh” Eronni qo‘llab-quvvatlab, Isroil hududiga raketalar va dronlar orqali hujum qilganidan keyin Isroil armiyasi Livandagi harakat infratuzilmasiga qarshi operatsiyalarni kuchaytirdi. Zarba komandalar markazlari, qurol omborlari va raketa pozitsiyalariga yetkazildi.

Isroilning baholashicha, Janubiy Livan va Bayrutning janubiy chekka hududlarida evakuatsiya haqida ogohlantirishlar berilgach, 500 minggacha odam o‘z uyini tark etib, mamlakat shimoliga ko‘chgan bo‘lishi mumkin. Shu bilan birga, Isroil chegara hududidagi yer operatsiyalarini kengaytirdi.