Har bir futbolchi Krishtianuga hasad qiladi – Runi

Angliya terma jamoasi va “Manchester Yunayted”ning sobiq hujumchisi Ueyn Runi Krishtianu Ronalduni “qizil iblislar” uchun omadsiz transfer deb atadi. Biroq portugaliyalik hujumchi joriy mavsumda MYUining birinchi raqamli to‘p urar futbolchisi  bo‘lib turganida ko‘pchilikka Ueynning gaplari yoqmadi.

Tabiiyki, Runining tanqidi Ronalduning ham g‘ashiga tekkan. Shundan so‘ng, Krishtianu Ueyn Runining Instagram sahifasidagi rasmlardan biriga “ikki hasadgo‘y” degan izoh qoldiradi. Gap shundaki, angliyalik sobiq futbolchi joylagan rasmda “Liverpul” afsonasi Jeymi Karrager ham bo‘lgan. Karrager portugaliyalik hujumchining ashaddiy tanqidchilaridan biri hisoblanadi.

Ronalduning izohidan so‘ng, Ueyn Runi barcha hozirgi futbolchilar Krishtianuga hasad qilishlari kerakligini tan oldi. Bu haqda “Goal” nashri xabar berdi.

“Bugun ertalab [Ronalduning izohini] ko‘rdim. Sayyoramizda Krishtianuga hasad qilmaydigan futbolchi topilmasa kerak. Uning erishgan martabasi, qo‘lga kiritgan sovrinlari, topgan pullari va uning oltin to‘plari barchasi ajoyib. Har bir futbolchi Lionel Messi va Krishtianu Ronalduga hasad qiladi”, degan angliyalik sobiq hujumchi.

Ma’lumot o‘rnida, joriy mavsumda Krishtianu Ronaldu “Manchester Yunayted” safida, Angliya Premer ligasi doirasida 24 ta uchrashuvda maydonga tushib, 12 ta gol urgan va 3 ta golli uzatma amalga oshirgan. Shuningdek, “qizil iblislar” Yevropa Chempionlar ligasini tark etgan bo‘lsa-da, 37 yoshli futbolchi ushbu musobaqaning 7 ta uchrashuvida maydonga tushib, 6 ta gol urishning uddasidan chiqqan.

“Yunayted”ning joriy mavsumda APLdagi ahvoli yaxshi emas. Jamoa 30 ta o‘yin o‘tkazib, 51 ochko jamg‘argan holda, musobaqa jadvalining 7-o‘rinni egallab turibdi. YeCHLga yo‘llanma beruvchi 4-pog‘onadagi “Tottenxem” bilan oradagi farq 3 ochkoni tashkil qilmoqda.

Ma’ruf Abdumalikov