Ҳар бир футболчи Криштиануга ҳасад қилади – Руни

Англия терма жамоаси ва “Манчестер Юнайтед”нинг собиқ ҳужумчиси Уэйн Руни Криштиану Роналдуни “қизил иблислар” учун омадсиз трансфер деб атади. Бироқ португалиялик ҳужумчи жорий мавсумда МЮининг биринчи рақамли тўп урар футболчиси  бўлиб турганида кўпчиликка Уэйннинг гаплари ёқмади.

Табиийки, Рунининг танқиди Роналдунинг ҳам ғашига теккан. Шундан сўнг, Криштиану Уэйн Рунининг Instagram саҳифасидаги расмлардан бирига “икки ҳасадгўй” деган изоҳ қолдиради. Гап шундаки, англиялик собиқ футболчи жойлаган расмда “Ливерпуль” афсонаси Жейми Каррагер ҳам бўлган. Каррагер португалиялик ҳужумчининг ашаддий танқидчиларидан бири ҳисобланади.

Роналдунинг изоҳидан сўнг, Уэйн Руни барча ҳозирги футболчилар Криштиануга ҳасад қилишлари кераклигини тан олди. Бу ҳақда “Gоаl” нашри хабар берди.

“Бугун эрталаб [Роналдунинг изоҳини] кўрдим. Сайёрамизда Криштиануга ҳасад қилмайдиган футболчи топилмаса керак. Унинг эришган мартабаси, қўлга киритган совринлари, топган пуллари ва унинг олтин тўплари барчаси ажойиб. Ҳар бир футболчи Лионель Месси ва Криштиану Роналдуга ҳасад қилади”, деган англиялик собиқ ҳужумчи.

Маълумот ўрнида, жорий мавсумда Криштиану Роналду “Манчестер Юнайтед” сафида, Англия Премьер лигаси доирасида 24 та учрашувда майдонга тушиб, 12 та гол урган ва 3 та голли узатма амалга оширган. Шунингдек, “қизил иблислар” Европа Чемпионлар лигасини тарк этган бўлса-да, 37 ёшли футболчи ушбу мусобақанинг 7 та учрашувида майдонга тушиб, 6 та гол уришнинг уддасидан чиққан.

“Юнайтед”нинг жорий мавсумда АПЛдаги аҳволи яхши эмас. Жамоа 30 та ўйин ўтказиб, 51 очко жамғарган ҳолда, мусобақа жадвалининг 7-ўринни эгаллаб турибди. ЕЧЛга йўлланма берувчи 4-поғонадаги “Тоттенхэм” билан орадаги фарқ 3 очкони ташкил қилмоқда.

Маъруф Абдумаликов