Журналистлар Трампни судга берди

Ўтган ҳафтада журналистлари Оқ уйга кириши тақиқланган учта янгиликлар нашри АҚШ Президент Дональд Трампга қарши даъво аризаси билан судга мурожаат қилди. Бу ҳақда “Politico” хабар берди.

Хабар қилинишича, Американинг CNN, Politico ва MS NOW нашрлари федерал судга Дональд Трамп ва унинг администрациясидаги учта бош маслаҳатчисига қарши даъво аризаси киритган.

Улар тўсатдан жорий этилган тақиқни “Конституцияга киритилган Биринчи тузатишга бевосита тажовуз” ҳамда ҳукумат матбуот нима ҳақида хабар беришини ҳал қилмаслиги тўғрисидаги тамойилнинг бузилиши деб атаб, ўз журналистларининг Оқ уйга кириш ҳуқуқини тиклашни талаб қилган.

“Оқ уй олдиндан огоҳлантирмасдан ва процессуал нормаларга риоя қилмасдан, репортажларимизга эътироз билдиргани сабабли журналистларимизнинг аккредитациясини бекор қилди. Агар бу (Трамп администрациясининг тақиқи) жавобсиз қолдирилса, матбуот эркинлигига ҳамда жамоатчиликнинг ҳокимият аралашувидан холи бўлган мустақил журналистикага бўлган ҳуқуқига таҳдид туғилади”, дейилади ОАВларнинг қўшма баёнотида.

Ташкилотлар Вашингтондаги АҚШ Округ судидан администрация ҳаракатларини шошилинч тартибда конституцияга зид деб тан олишни ва уларнинг кейинги ижросини тақиқлашни сўраган.

Даъво бўйича Трампдан ташқари, Оқ уй аппарати раҳбари Сьюзи Уайлс, коммуникациялар бўйича директор Стивен Ченг ва Махфий хизмат директори Шон Карран жавобгар сифатида тортилган.

Маълумот учун, 18 сентябрь куни АҚШ Президенти CNN, MS NOW ва “Politico” мухбирларига Оқ уйга киришни тақиқлашини, чунки ушбу нашрлар гўёки фейк янгиликлар тарқатаётганини маълум қилган. Эртаси куниёқ ушбу нашрлар журналистлари ўзларининг Оқ уйга киритилмагани ҳақида хабар берган. Шундан сўнг, Дональд Трамп CNN, MSNBC ва “Politico” логотиплари туширилган ахлат халталари тасвирини эълон қилган.