Жокович теннис тарихида ноёб натижага эришди

Кеча, 19 январь куни дунёнинг тўртинчи ракеткаси Новак Жокович Австралия очиқ чемпионатидаги 100-учрашувида ғалаба қозонди. Шу тариқа у теннис тарихида учта “Катта дубулға” турнирида – Австралия очиқ чемпионатида (100 ғалаба), “Ролан Гаррос”да (101) ва Уимблдонда (102) 100 ва ундан ортиқ ғалабага эришган илк теннисчига айланди. Бу ҳақда “Optaаce” хабар берди.

Новак Жокович 2026 йилги Австралия очиқ чемпионатининг яккалик баҳсларида иккинчи босқичга йўл олди. Сербиялик теннисчи мусобақанинг биринчи босқичида испаниялик Педро Мартинесни уч сетда ишончли тарзда 6/3, 6/2, 6/2 ҳисобида мағлуб этиб, “Australian Open”даги 100-ғалабасини нишонлади.

Австралия очиқ чемпионатида энг кўп ғалаба қайд этган теннисчи бўйича рекорд ҳозирча афсонавий швейцариялик Рожер Федерерга тегишли. Унинг ҳисобида ушбу мусобақада 102 та ғалаба мавжуд. Агарда Жокович турнирнинг чорак финалига чиқадиган бўлса, жорий йилнинг ўзида янги рекорд ўрнатиши мумкин.

Мельбурнда ўтаётган турнирнинг иккинчи босқичида 38 ёшли сербиялик теннисчи ATP рейтингида 141-ўринда бораётган италиялик Франческо Маэстреллига қарши кортга чиқади.

Маълумот учун, Новак Жокович Австралия очиқ чемпионатида 10 марта ғолиб чиққан бўлиб, бу эркаклар ўртасидаги мутлақ рекорд ҳисобланади. У шунингдек, фаолияти давомида жами 24 та “Катта дубулға” турнири чемпионлигини қўлга киритган.