Жокович фаолиятини якунлашга яқин қолганини айтди

24 та “Катта дубулға” турнири ғолиби, сербиялик теннисчи Новак Жокович фаолиятини якунлаш лаҳзасига ҳар қачонгидан ҳам яқинроқ эканини айтди. Бу ҳақда у Нью-Йоркда бўлиб ўтган “Fanatics Fest” тадбирида маълум қилди.

“Мен ҳали ҳам энг юқори даражада рақобатлаша олишимни ҳис қиляпман. Аммо фаолиятимни якунлайдиган вақт, шубҳасиз, ҳар қачонгидан ҳам яқинроқ. Андре Агасси бир пайтлар фаолиятининг қачон тугашини билмаслигини, бироқ бу содир бўлганда ҳаммаси жуда тез юз беришини айтганди. Менимча, у ҳақ эди. Баъзи спортчилар чўққида турган пайтида кетишни истайди, бошқалари эса танаси энди юкламаларга бардош бера олмаганда. Яна шундай спортчилар ҳам борки, улар дунёнинг энг кучли ўйинчиларига энди муносиб қаршилик кўрсата олмаслигини англагач фаолиятини якунлайди. Мен эса ҳозирча ҳали ҳам ўйнай олаётганимдан завқланишга ҳаракат қиляпман”, дейди Жокович.

39 ёшли Жокович айни пайтда Теннис бўйича профессионал теннисчилар ассоциацияси (ATP) рейтингида 7-ўринни эгаллаб турибди. У яккалик баҳсларида ATP таснифидаги 101 та турнирда ғолиб чиққан, шундан 24 таси “Катта дубулға” мусобақалари бўлиб, бу эркаклар ўртасидаги яккалик баҳсларида мутлақ рекорд ҳисобланади.

Маълумот учун, Жокович 2024 йилги Олимпия ўйинлари чемпиони, 2008 йилги Олимпиада бронза медали совриндори ҳамда 2010 йилги Дэвис кубоги ғолиби ҳисобланади. Шунингдек, у дунёнинг биринчи ракеткаси сифатида 428 ҳафта давомида етакчилик қилган мутлақ рекорд соҳибидир.