Жиззахда эркак 25 ёшли хотинини уриб ўлдирди

Жиззах вилояти Шароф Рашидов туманидаги уйлардан бирида аёл кишининг жасади топилди. Унинг эри қотилликда гумон қилинмоқда. Бу ҳақда “Миллар” дастурида хабар қилинди.  

Марҳуманинг яқинларининг айтишича, биргаликдаги ҳаёти давомида эр-хотин ўртасида доимо жанжаллар бўлган.

“Уларнинг оиласидаги жанжаллар тугамади. 2022 йилда жиддий можаро юз берди, шундан сўнг у ота-онасининг уйига қайтди. Унга ҳимоя ордери берилди. Унинг қандай ўлганини билмаймиз, лекин уч ёшли ўғли менга отаси уни таёқ билан урганини айтди”, дейди марҳуманинг опаси.

Маҳалладаги хотин-қизлар фаоли ҳам вазиятга изоҳ берар экан, марҳума яхши аёл бўлгани ва уйини доим тоза тутганини таъкидлаган. Унинг фикрича, ҳолатга рашк сабаб бўлган бўлиши мумкин.

Аниқланишича, гумонланувчи турмуш ўртоғини бир неча марта уриб, тан жароҳатлари етказган, кейин эса бўғиб ўлдирган. Оқибатда 1999 йилда туғилган аёл вафот этган.

Ҳозирда мазкур ҳолат юзасидан вилоят прокуратураси томонидан жиноят иши қўзғатилиб, тергов ҳаракатлари олиб борилмоқда.