Жефф Безос “Ливерпуль”ни сотиб олиши мумкин

Amazon асосчиси Жефф Безосга Англиянинг “Ливерпуль” футбол клубидан улуш сотиб олиш бўйича музокара олиб бораётган консорциум таркибига қўшилиш таклиф қилинди. Бу ҳақда “The Guardian” нашрлари хабар берди.

Манбага кўра, “Куинз Парк Рейнжерс” клубининг собиқ ҳамэгаси Амит Бхатиа бошчилигидаги консорциум “Ливерпуль” эгаси ҳисобланган Fenway Sports Group (FSG)нинг клубдаги тахминан 30 фоизлик улушини 1,35 миллиард фунт стерлингга, яъни қарийб 1,8 миллиард долларга сотиб олиш бўйича дастлабки таклиф билан чиққан.

Айни пайтда консорциум битимни молиялаштириш учун қўшимча сармоядорларни жалб қилишга ҳаракат қилмоқда.

FSG Бхатиа бошчилигидаги гуруҳ билан “Ливерпуль”га стратегик миноритар инвестиция киритиш масаласида музокаралар ўтказилганини тасдиқлаган. Шу ҳафта бошида ҳиндистонлик миллиардер Лакшми Митталнинг куёви бўлган Амит Бхатиа Англия Чемпионшипида иштирок этувчи “Куинз Парк Рейнжерс” клубидаги улушидан воз кечган.

Жефф Безос аввалроқ NFL’даги “Сиэтл Сихокс” ва “Вашингтон Коммандерс” клубларини сотиб олиш имкониятини кўриб чиққан. Бироқ у шу пайтгача Англия Премьер-лигаси клубларига жиддий қизиқиш билдирмаган. FSG “Ливерпуль” клубига 2010 йилдан буён эгалик қилиб келмоқда.

“Forbes” баҳосига кўра, Жефф Безоснинг бойлиги 253 миллиард долларни ташкил этади ва у дунёнинг энг бой инсонлари рўйхатида тўртинчи ўринни эгаллайди. Лакшми Митталнинг бойлиги эса 31,3 миллиард долларга баҳоланиб, у рейтингда 72-ўринда қайд этилган.

Маълумот учун, “Ливерпуль” ўтган мавсумни совринсиз якунлади. Жамоа Англия Премьер-лигасида бешинчи ўринни эгаллади ва Чемпионлар лигасининг чорак финал босқичида мусобақани тарк этди.

Эслатиб ўтамиз, аввалроқ “Ливерпуль” клубига эгалик қилувчи Американинг Fenway Sports Group инвестиция компанияси Мерсисайд клубидаги маълум бир улушини сотиш бўйича музокаралар олиб бормаётгани ҳақида хабар берилганди.