ЖЧ-2022. 1/8 финалда “даҳшатли” тўқнашув бўлиши мумкин

28 ноябрь куни футбол бўйича Жаҳон чемпионати гуруҳ босқичининг 2-туридан ўрин олган сўнгги ўйинлар бўлиб ўтди. Уларнинг натижаларига кўра, икки жамоа 1/8 финал йўлланмасини кафолатлади.

"G" гуруҳи

Ушбу квартетда гуруҳ босқичи якунланишига бир тур қолганида плей-оффнинг биринчи иштирокчиси аниқланди. Бразилия иккита ўйинда ғалаба қозониб, 1/8 финалга йўлланмани қўлга киритди. 1-ўрин билан плей-оффга чиқиш учун Тите жамоаси сўнгги турда Камерунга ютқазмаса кифоя.

Бу гуруҳда бир вақтнинг ўзида учта жамоа 2-ўринга даъвогарлик қилмоқда, аммо Африка жамоасининг 1/8 финалга чиқиш имконияти пастроқ. Камерун Бразилияни мағлуб этиши керак, чунки ҳар қандай бошқа сценарийда жамоа 1/8 финалга чиқа олмайди. Катта эҳтимол билан Сербия ва Швейцария плей-оффнинг иккинчи йўлланмаси учун курашади. Сербларни фақат ғалаба қаноатлантиради, Мурат Якин шогирдларига эса мағлуб бўлмаслик кифоя. Аммо бундай ҳолатда Камерун Бразилияни мағлуб этиб қўймаслиги керак.

3-тур ўйинлари тақвими:

2 декабрь

00:00. Сербия - Швейцария;

00:00. Камерун - Бразилия.

"H" гуруҳи

Бу ерда ҳам плей-оффнинг бир иштирокчиси аниқланди. Португалия Уругвайни мағлуб этди ва Жанубий Америка жамоасини қийин вазиятга тушириб қўйди. Энди португалларга Жанубий Корея ҳам, Уругвай ҳам етиб ололмайди. Тўғри, Сантуш жамоаси ҳали гуруҳда 1-ўринни қўлга киритгани йўқ. Дейлик, сўнгги турда Португалия корейсларга 0:1 ҳисобида мағлуб бўлса, Гана эса Уругвайни икки тўп фарқи билан мағлуб этса, айнан Африка терма жамоаси 1-ўринга чиқади. Агар Португалия Осиё термасига ютқазмаса, у ҳолда мазкур квартетда 1-ўринни қўлга киритади.

Гана охирги турда Уругвай устидан ғалаба қозонса, 1/8 финал йўлланмасига эга чиқади. Агар африкаликлар мағлуб бўлса, мусобақани мухлислар қаторида кузатиб боради. Дуранг қайд этилса, Гана сўнгги турда Португалияга мухлислик қилади. Осиё термаси эса албатта Португалияни мағлуб этиши, Гана эса Уругвайни мағлуб этмаслигига умид қилиши керак.

3-тур ўйинлари тақвими:

2 декабрь

20:00. Жанубий Корея - Португалия;

20:00. Гана - Уругвай.

Қўшимча қиламизки, 1/8 финалда "G" гуруҳи ғолиби "H" гуруҳининг иккинчи жамоаси билан, "H" гуруҳи ғолиби эса "G" гуруҳининг иккинчи жамоаси билан тўқнаш келади. Назарий жиҳатдан Бразилия – Португалия ўйинини кўришимиз мумкин.