ЖАР Украинадаги “алданган” эркаклар бўйича Россия билан музокаралар олиб бормоқда 

Жанубий Африка Республикаси (ЖАР) ҳукумати Украинада Россия сафида жанг қилаётган 17 нафар жанубий африкалик эркакни ватанига қайтариш бўйича Россия билан музокаралар олиб бормоқда, чунки улар Жанубий Африканинг собиқ президенти Жейкоб Зуманинг қизи томонидан урушнинг олдинги чизиғига алданиб олиб борилгани айтилмоқда. Бу ҳақда “The Guardian” хабар берди.

Қайд этилишича, Дудузиле Зума-Самбудла июль ойида 17 нафар жанубий африкалик ва икки ботсваналик эркакни отасининг Умхонто ве Сизуэ сиёсий партияси учун тансоқчи сифатида ўқиш ёки шахсий ривожланиш курсида қатнашишини айтиб, уларни Россияга жалб қилган.

“Бу йигитларни қайтариб олиш жараёни жуда нозик жараён бўлиб қолмоқда. Улар хавфли муҳитда. Улар ҳаётлари учун жиддий хавф остида ва биз уларни бу вазиятдан қандай қутқаришимиз мумкинлигини кўриш учун Россияда ҳам, Украинада ҳам турли расмийлар билан музокаралар олиб бормоқдамиз. Аслида, асосий эътибор Россия расмийларига кўпроқ, Украина расмийларига эса камроқ қаратилган, чунки бизда мавжуд бўлган маълумотларга кўра, улар Россия ҳарбий кучларига аралашиб кетган”, дейди Жанубий Африка Президенти Сирил Рамафосанинг матбуот котиби Винсент Магвеня.

Россиянинг Жанубий Африкадаги элчихонаси изоҳ бериш сўровига жавоб бермаган.

Маълумот ўрнида, 5 декабрь куни урушга юборилганларнинг яқинлари Дурбан шаҳар ҳокимияти олдида “Бизнинг эркакларимизни уйга қайтаринг – урушни тугатинг” ва “Уларни тирик қайтаринг. Уларни соғ-саломат қайтаринг” каби ёзувлар туширилган плакатларни кўтариб норозилик билдирган.

Эслатиб ўтамиз, аввалроқ йигитларни Украинадаги урушга ёллаган собиқ президентнинг қизи истеъфога чиққани ҳақида хабар берилганди.