Жапаров кутилмаганда Бишкекдаги бозорга борди (видео)

Бугун, 21 октябрь куни Қирғиз Республикаси Президенти Садир Жапаров режадан ташқари Бишкек шаҳридаги янги “Мадина” бозорига ташриф буюриб, савдо қилиш шароитлари ва савдо ўринларини йўқотиш мумкинлигидан хавотир билдирган савдогарлар билан учрашди. Бу ҳақда Президент матбуот хизмати хабар берди.

Қайд этилишича, янги бозор қурилаётган ер участкасига эгалик қилган тадбиркор лойиҳани якунлай олмаган ва уни ўз ихтиёри билан давлатга топширган. Шу билан бирга, у киритган маблағлар бозор даромад келтира бошлаганидан сўнг босқичма-босқич қайтарилади. Ҳозирда Президент Ишлар бошқармаси бозорнинг очилишига тайёргарлик ишларини якунламоқда.

Қирғизистон раҳбари янги бозорнинг савдо шохобчаларини кўздан кечирган. Президент Ишлар бошқарувчиси Қанибек Туманбаев объект ёнғин ва санитария хавфсизлиги талабларига жавоб беришини ҳамда очилишга тайёрланаётганини маълум қилган.

Тадбиркорлар ўзларини ташвишга солаётган масалалар ҳақида гапириб, ижара ҳақини камайтириш имкониятини кўриб чиқишни сўраган. Улар Президентга ўз муаммоларига эътибор қаратгани учун миннатдорлик билдирган ва илгари янги бозор давлат раҳбарининг яқин қариндошларига тегишли экани ҳақида нотўғри маълумот олганини айтган.

Сўнг Президент август ойи охирида ёнғин юз берган эски “Мадина” бозорига ташриф буюрган. У ерда ҳам у савдогарлар билан мулоқот қилган. Суҳбат давомида жабрланганларга компенсация тўлаш эски “Мадина” бозори жойлашган ер участкаси эгаси ҳисобидан амалга оширилиши маълум бўлган.

Алоҳида қайд этилишича, баъзи тадбиркорлар илгари савдо ўринларини бозорнинг олдинги эгаларидан сотиб олган. Бундай ҳар бир мурожаат ҳуқуқни муҳофаза қилувчи органлар иштирокида якка тартибда кўриб чиқилади.

Янги бозор маъмуриятининг маълумотига кўра, савдогарларнинг 90 фоизга яқини аллақачон янги савдо нуқталарига кўчиб ўтган.

Садир Жапаров Президент Ишлар бошқарувчиси Қанибек Туманбаевга савдогарлар учун хавфсиз ва қулай шароитлар яратишга алоҳида эътибор қаратган ҳолда, бозорнинг очилишига оид барча тайёргарлик ишларини якунлашни топширган.

Мамлакат раҳбари ноябрь ойи бошигача янги “Мадина” бозори ишлашга тўлиқ тайёр бўлиши ва штат режимида фаолият юритиши кераклигини таъкидлаган.

Эслатиб ўтамиз, аввалроқ Садир Жапаров меҳнат мигрантларига мамлакатда иш ўринлари мавжудлигини айтиб, уларни ватанига қайтишга чақиргани ҳақида хабар берилган эди.