Жанубий Кореядаги ўзбекистонликлар огоҳлантирилди

Ўзбекистон Республикасининг Корея Республикасидаги элчихонаси ушбу мамлакатдаги ўзбекистонликларни турли митинглар, намойишлар ва оммавий йиғинларда иштирок этмасликка чақирмоқда. Бу ҳақда элчихонанинг Telegram-каналида тегишли огоҳлантириш эълон қилинди.

Қайд этилишича, Корея Республикасидаги бугунги ички сиёсий ўзгаришларга қарамасдан, мамлакатдаги кундалик ҳаёт одатдагидек давом этмоқда. Шу билан бирга, яқин кунлар ичида Корея Конституциявий суди томонидан импичмент бўйича якуний қарор эълон қилиниши арафасида Сеул шаҳрида йирик намойишлар ва митинглар ўтказилиши кутилмоқда.

Шу боис фуқаролар Жанубий Кореяда турли митинглар, намойишлар ва оммавий йиғинларда иштирок этмасликка, одамлар гавжум жойларга бормасликка, Сеул бўйлаб ҳаракатланиш йўналишларини олдиндан режалаштиришга, шахсий хавфсизлик ва соғлиқни эҳтиёт қилишга,  ижтимоий тармоқларда провокацион хабарларни тарқатмасликка, расмий янгиликларни кузатиб боришга ва маҳаллий ҳокимият органларининг кўрсатмаларига амал қилишга чақирилади.

Зарурат бўлган ҳолатда қуйидаги телефон рақамларига мурожаат қилиш сўралган:

• +82 10 3213 4505;
• +82 10 2909 4334;
• +82 2 574 6554.

Эслатиб ўтамиз, аввалроқ Ўзбекистоннинг Истанбул шаҳридаги Бош консулхонаси Туркияда Истанбул шаҳри ҳокими Экрем Имомўғлининг ҳибсга олиниши ортидан бошланган намойишлар сабабли огоҳлантириш билан чиққан эди.