Жанубий Кореяда ўзбекистонлик талаба қарийб 1,5 йилга қамалди

Жанубий Кореяда Суриядаги террорчилик ташкилотини молиялаштирган ўзбекистонлик талаба 1 йил-у 4 ойга қамалди. Бу ҳақда “Yonhap” агентлиги хабар берди.

Маълум қилинишича, Ўзбекистон фуқароси Жанубий Кореяга университет қошидаги тил марказида таҳсил олиш учун D-4-1 визаси билан келган ва мамлакатда талаба сифатида яшаб келган. Шу вақт давомида у БМТ томонидан террорчилик ташкилоти деб белгиланган KTЖ (Катиба ат-Тавҳид вал-Жиҳод) гуруҳи аъзоси билан алоқага чиққан.

Суд маълумотларига кўра, у 2024 йил январидан 2025 йил январигача террорчилик ташкилоти аъзоси кўрсатган ҳисоб рақамига олти марта пул ўтказган. Жами юборилган маблағ 1,25 миллион вонни ташкил этган.

Бундан ташқари, ташкилот аъзоси ундан Жанубий Кореяда яшовчи бошқа бир шахс юборадиган пулни қабул қилиб, Сурияга жўнатишда ёрдам беришни сўраган. Айбланувчи бу маблағни қабул қилишга уринган, бироқ пулни олиш амалга ошмаган.

Суд айбланувчининг террорчилик ташкилотини молиялаштираётганини билган ҳолда пул юборганини ва унинг фаолиятини қўллаб-қувватлаганини билдирган. Судья бундай маблағлар террорчилик ташкилотининг фаолиятини давом эттириши учун муҳим эканини, пул миқдоридан қатъи назар, бу ҳаракатлар халқаро тинчлик, давлат ва жамоат хавфсизлигига таҳдид солишини айтган.

Шу билан бирга, суд айбланувчининг қилмишини тан олганини жазо тайинлашда инобатга олган. Унга 1 йил-у 4 ой қамоқ жазоси тайинланиб, 1,25 миллион вон миқдоридаги маблағни ундириш ҳақида ҳам қарор чиқарилган.

Маълумот учун, KTЖ 2014 йил декабрь ойида ташкил этилган экстремистик гуруҳ ҳисобланади. У 2015 йил сентябрь ойида Суриянинг Ал-Фуа ҳудудида содир этилган автомобил портлаши, 2016 йил августда Қирғизистондаги Хитой элчихонасига уюштирилган худкушлик ҳужуми ҳамда 2017 йил апрель ойида Россиянинг Санкт-Петербург шаҳридаги метрода содир этилган портлаш ортида турганликда гумон қилинган.

Ташкилот аъзоси айбланувчига ўзини ҳам Ўзбекистон фуқароси деб таништирган. Шунингдек, KTЖ Суриядаги ҳукумат қўшинлари ва Россияга қарши жанг олиб бораётганини айтган.

Эслатиб ўтамиз, аввалроқ Россиянинг Владивосток шаҳрида эркакни бейсбол таёқчаси билан уриб, оғир жароҳат етказган Ўзбекистон фуқароси 5 йилга озодликдан маҳрум қилинганди.