Зеленскийга ноёб чех тўппончаси совға қилинди. Бу нимани англатади?

Чехия Президенти Петр Павел Украина етакчиси Владимир Зеленскийга автоматик зарядланадиган SZ 75 тўппончасини совға қилди. Бу ҳақда Чехия раҳбари Twitter'да маълум қилди.

“Бизнинг қуролларимиз Украинага бошиданоқ курашда ёрдам берди. Уларнинг қаҳрамонлигига ҳурмат белгиси сифатида мен Зеленскийга серия рақами 22 бўлган афсонавий SZ 75 тўппончасини совға қилдим”, дейди сиёсатчи.

Президент Павелнинг таъкидлашича, у ўзининг украиналик мавқедошига мамлакат олдидаги хизматлари, мудофаа ва хавфсизликни таъминлашга қўшган ҳиссаси ҳамда миллатнинг халқаро обрўсини оширгани учун Чехия Республикасининг олий мукофоти – “Оқ шер” орденининг 100 йиллигига бағишланган махсус сериядаги ноёб тўппончани совға қилган.

Унинг сўзларига кўра, бу тўппонча Зеленскийнинг Украина бошида турган жасоратини акс эттиради.

Маълумот учун, давлат раҳбарларига қурол совға қилиш қадимий одатга кўра, совға олган шахсга ғалаба тилашни англатади.