Зеленский Россия билан музокаралар қачон бўлиши мумкинлигини айтди

Украина учун Россия Федерацияси билан музокаралар фақат сўзсиз ўт очишни тўхтатишга эришилгандан кейингина мумкин бўлади. Бу ҳақда Украина Президенти Владимир Зеленский Киевда Франция Қуролли кучлари Бош штаби бошлиғи Тьерри Буркхардт, Буюк Британия Қуролли кучлари Бош штаби бошлиғи Тони Радакин ва Украина армиясининг юқори мартабали вакиллари билан учрашуви якунлари бўйича журналистларга маълум қилди.

Учрашувда ўт очишни тўхтатган тақдирда Украина учун хавфсизлик кафолатлари, шунингдек, тинчликпарвар сифатида у ерга хорижий қўшинларни киритиш каби масалалар муҳокама қилинди. Бироқ Зеленский журналистларга Франция ва Буюк Британия вакиллари билан музокаралар чоғида муҳокама қилинган мавзулар тафсилотларини ошкор қилмаслигини айтди.

“Мен кўп тафсилотларни ошкор қила олмайман, чунки бу ҳали бошланиши, аммо бу ишнинг чуқур бошланиши”, деди Зеленский.

Давлат раҳбари бу борадаги ишлар икки ой аввал бошланганини ва бутун жараён яна бир ой давом этиши мумкинлигини эслатди. Украина раҳбари, шунингдек, фақат уч давлат Украина учун хавфсизлик кафолатларини яратиш жараёнида иштирок этмаслигини айтди: 

“Бу коалиция бўлади”, деб тушунтирди давлат раҳбари.

Зеленскийнинг айтишича, учрашувда тинчликпарвар кучлар сони ва уларнинг мандати каби масалалар муҳокама қилинган.

“Бу қўшинларга қайси босқичда ишонишимиз мумкинлигини тушуниш мен учун муҳим”, деди Украина Президенти.

Зеленский Кривой Рог шаҳрига берилган ракета зарбалари ҳақида гапирар экан, Россия “урушни узайтиришга интилаётганини” таъкидлади. У Украина можарога барҳам бериш учун Москва билан музокаралар олиб боришга тайёрлигини, бироқ Россия ҳужумларини тўхтатиши кераклигини қўшимча қилди: 
“Шунчаки гаплашишдан нима фойда? Биринчи навбатда, сўзсиз ўт очишни тўхтатиш керак. Биз ўт очишни тўхтатиш шартсиз бўлиши керак, кейин эса исталган форматда гаплаша оламиз, деб ҳисоблаймиз”, деди Украина етакчиси.

Зеленскийнинг қўшимча қилишича, у АҚШнинг Россияга нисбатан “босимини оширишга” тайёрланаётгани ҳақида маълумот олган ва қатъий қадамларга умид билдирган.

“Биз айнан шундай ҳал қилувчи санкцияларни кутмоқдамиз”, деди Президент.

Америка Қўшма Штатлари билан имзоланиши режалаштирилган ноёб ер ресурслари бўйича келишув лойиҳаси устидаги ҳозирги ишлар ҳақида гапирар экан, Зеленский бу жараёнда Украинага адвокатлик фирмаси вакиллик қилишини айтди. Украина раҳбари ушбу лойиҳада иштирок этадиган учта компаниядан бирини танлаш жараёни яқин кунларда якунланишини қайд этди.

“Биз бу келишувда фақат ҳамкорлик қадамларини кўрамиз ва жамоа бу борада ишламоқда”, дея қўшимча қилди Зеленский.

Давлат раҳбари техник гуруҳ келишув лойиҳасини келаси ҳафта кўриб чиқиш учун унга тақдим этишини таъкидлади. 

“Шундан сўнг Украина делегацияси тегишли келишувни тузиш учун АҚШга боришга тайёр бўлади”, дея тушунтирди Президент.

Давлат раҳбари нутқи якунида Россиянинг Курск вилоятидаги вазиятга баҳо бериб, Украина армияси бу ҳудудда қамалда эмаслигини таъкидлади.

Шунингдек, у Украина Қуролли кучлари 64 минг рус аскарининг Курск вилоятидаги юришини тўхтатиб қўйганини таъкидлади.

Эслатиб ўтамиз, 3 апрель куни Зеленский Чернигов ва Россиянинг Курск вилояти билан чегарадош Суми вилоятига борганди. Кеча, 4 апрель куни Россиянинг  Зеленский туғилиб ўсган шаҳар – Кривой Рогга уюштирган ракета ҳужуми оқибатида камида 18 киши ҳалок бўлди. Улар орасида тўққиз нафар бола ҳам бор. Шунингдек, ҳужум оқибатида 50 дан ортиқ киши жароҳат олган.