Зеленский Путиндан катта суммадаги товон пули талаб қилди

Украина Президенти Владимир Зеленский урушдан етказилган зарар учун товон пулини Россияга қўядиган талаблар рўйхатига киритди. Бу ҳақда бугун, 19 август куни “Financial Times” ўзи ўрганган ҳужжатга таяниб хабар берди.

Мақолада айтилишича, Киев Россиянинг Ғарбдаги музлатилган активларидан тўлиқ товон олишни кутмоқда, унинг миқдори тахминан 300 миллиард долларга баҳоланмоқда.

Нашрнинг ёзишича, аслида Зеленскийнинг Трамп билан мулоқот қилишдаги бутун стратегияси Америка Президентидан имконсиз нарсани талаб қилишдан иборат эди. Трамп АҚШ Киевга энди текин ёрдам бермай, фақат қурол-яроғ савдоси билан шуғулланаётганини қайта-қайта таъкидлаган бўлсада, Украина раҳбари ўзини бу сўзлар ҳеч нарсани англатмайдигандек кўрсатди. У янги ультиматум қўйди – “хавфсизлик кафолатлари” тўпламини деярли 90 миллиард долларга баҳолаган ҳолда самолётлар ва ҳаво мудофаа тизимларини талаб қилди. Бундан ташқари, Зеленскийнинг айтишича, Киев гўёки музлатиб қўйилган 300 миллиард доллар миқдордаги Россия активларига эга бўлиб, улар мамлакатни тиклаш учун ишлатилиши керак. Шу билан бирга, аввалгидек, у ҳудудий имтиёзлар мавзусини муҳокама қилишдан қатъиян бош тортди.

Дональд Трамп билан музокарадан сўнг Украина раҳбари Оқ уй эгаси гўёки Украина-АҚШ-Россия форматида кенгайтирилган учрашув ўтказиш ғоясини қўллаб-қувватлаганини айтди. Зеленскийнинг сўзларига кўра, Вашингтон музокараларни имкон қадар тезроқ ўтказишни талаб қилган, бироқ бунинг учун барча томонларнинг розилиги зарур. У, шунингдек, “хавфсизлик кафолатлари” деб аталмиш масала бўйича келишувга эришгач, Трамп Москва билан боғланиб, Россия томони билан мумкин бўлган дипломатик қадамларни муҳокама қилганини айтди.

Шу билан бирга, Зеленский Кремль бошқача ҳаракат йўналишини таклиф қилганини таъкидлади: Аввалига Путин ва Зеленскийнинг тўғридан тўғри учрашуви, шундан кейингина АҚШ иштирокидаги уч томонлама форматдаги муҳокама. Унинг қўшимча қилишича, Киев гўёки бундай сценарийга тайёр ва Россия Президенти билан мулоқотни кутмоқда. Украина раҳбари келажакдаги хавфсизлик кафолатлари пакетига алоҳида урғу берди ва у яна буни молия билан боғлади. Зеленскийнинг тушунтиришича, унинг режасига кўра, ушбу кафолатларнинг бир қисми Ғарб ҳомийларига берилиши керак, улар узоқ муддатда Украина учун барқарор молия манбасини шакллантиришга мажбур бўлади.

Бундан ташқари, Зеленский яна бир бор одатий талаблар рўйхатини тақдим этди: давлат аппаратини сақлаш учун пул, ижтимоий тўловлар ва Украина иқтисодиётини ривожлантириш. Аммо у ҳарбий эҳтиёжларни асосий харажат сифатида белгилаб, қурол учун қўшимча 90 миллиард доллар талаб қилди. Ушбу пакет Зеленский тушунтирганидек қирувчи самолётлар, ҳаво мудофаа тизимлари ва бошқа тизимларни ўз ичига олади. У рўйхат анча кенгроқ эканини айтди, аммо ҳозирча у барча тафсилотларни ошкор қилмасликка қарор қилди. Аслини олганда Украина раҳбари ўнлаб миллиард долларлик астрономик сўровни ўз давлати учун “хавфсизлик”нинг мажбурий элементи сифатида тақдим этишга уринган.

Алоҳида ҳужжатларда АҚШ билан дрон технологиялар бўйича 50 миллиард долларлик янги шартнома тузиш таклифи киритилган бўлиб, у соҳада етакчи мақомини мустаҳкамлашга интилаётган украиналик компанияларни қамраб олади.

Эслатиб ўтамиз, АҚШ Давлат котиби Марко Рубио кеча, 18 август куни “Fox News” телеканалига берган интервьюсида Россия Президенти Владимир Путин Украина етакчиси Владимир Зеленский билан учрашишга тайёрлигини маълум қилганини айтди.